Раён прыступіў да сяўбы зерневых
У гаспадарках раёна пачалі сеяць азімыя зерневыя, у прыватнасці, пшаніцу і трыцікале. Пачатак сяўбы некалькі запознены: у адпаведнасці з тэхналагічнымі рэкамендацыямі да сяўбы пшаніцы неабходна было прыступіць яшчэ 5 верасня. Аднак магчымасцей для гэтага не было: тэхніка “адмаўлялася” працаваць на палях з надзвычай перасушанай глебай, хоць у тым жа СВК “Гігант” захады прадпрымаліся неаднойчы.
Між тым дождж, які прайшоў у пятніцу, а затым і ў выхадныя дні, сітуацыю некалькі палепшыў. У выніку пасля філіяла “Агракамбінат КХП” Бабруйскага камбіната хлебапрадуктаў, дзе да сяўбы прыступілі першымі, у пасяўныя работы ўключыліся іншыя сельгасарганізацыі: СВК “Гігант”, СВК “Стасеўка”, ААТ “Саўгас “Кісялевічы”, філіял “Харчавік-Агра”.
У райсельгасхарчы адзначылі, што, пры наяўнасці дастатковай колькасці паліва, перабоі з якім у гаспадарках апошнім часам меліся, пасяўныя работы будуць весціся з раніцы да позняга вечара. Каб завяршыць азімую сяўбу ў вызначаныя тэрміны, механізатары гатовы працаваць у некалькі змен.
Адначасова ў гаспадарках займаюцца капаннем бульбы. Сёлета пад гэтую культуру ў раёне занята без малога адна тысяча гектараў. На раніцу ўчарашняга дня 154 з іх (19 працэнтаў) было ўбрана. Найбольш актыўна капанне вядзецца ў СВК “Гігант” — на долю гаспадаркі прыходзіцца больш за палову раённага плану (550 га), і ў СВК “Калгас імя А. Неўскага”, дзе пад бульбяныя палеткі адведзена 200 га. Найвышэйшы паказчык ураджайнасці ў “Гіганце”, у сярэднім з круга тут узялі па 210 цэнтнераў клубняў. Праўда, да падвядзення вынікаў яшчэ далёка — выкапана толькі каля 20 працэнтаў плошчаў.
Сярод асноўных работ, якімі займаюцца сельгасвытворцы на гэтую пару, і ўборка кукурузы на корм жывёле. Сілас закладваецца ў траншэі для выкарыстання ў зімне-стойлавы перыяд.
Алена КАРПЕНКА.