Не пакінута без увагі ніводная травінка

Нягледзячы на тое, што ўборка зерневых і зернебабовых у раёне завершана, клопатаў у работнікаў палёў дастаткова. Працягваюцца ворыўныя работы пад сяўбу азімых зерневых культур, у асобных гаспадарках вядзецца сяўба азімага рапсу. Тэрміны для гэтага аптымальныя, аднак заняцца дадзенай работай не ўсюды магчыма: з-за перасушанасці глебы масіўныя пасяўныя агрэгаты літаральна вязнуць у пяску, іх перамяшчэнне абмежавана. Таму сеюць на гэты час усяго дзве гаспадаркі: філіял “Агракамбінат КХП” ААТ “Бабруйскі камбінат хлебапрадуктаў” і ААТ “Саўгас Кісялевічы” і тое не пасяўнымі агрэгатамі, а лёгкімі сеялкамі і на палях, дзе гэта адносна магчыма. Пры ўмове і далейшай адсутнасці дажджоў — па цяперашнім годзе і гэтага можна чакаць — ад сяўбы азімага рапсу, верагодна, і ўвогуле прыйдзецца адмовіцца.

DSC00078Як бы не складвалася надвор’е, — адзначаюць у райсельгасхарчы — тэрміны ёсць тэрміны і вызначаюцца яны не проста так: перш чым увайсці ў зіму, рапсавым палеткам павінна быць не меней за 90 дзён. На гэты час у раёне культурай на зерне засеяна каля трохсот гектараў з 3070 запланаваных, а час сяўбы ўжо набліжаецца да заканчэння. Між тым рапс — надзвычай каштоўная культура, запатрабаваная як для прамысловых мэт — вытворчасці алею, так і ў жывёлагадоўлі: адходы яго ў выглядзе жмыху з’яўляюцца адной са складаючых рацыёну жывёлы. Пастаўляючы насенне на перапрацоўку, гаспадаркі могуць разлічваць на працягу года на каштоўны, багаты на бялок, корм. Болей таго, у мінулым годзе, па словах намесніка начальніка райсельгасхарчу Ж.А. Жукоўскай, жывёле у якасці корму паспрабавалі даць рапсавую салому, вынік аказаўся нечаканым — прыйшлася да спадобы. А сёлета, з улікам цяжкага года: намалот зерневых удвая ніжэйшы за мінулагодні, маюцца складанасці з выкананнем дзяржзаказу, — на зіму занатоўваюць не толькі рапсавую салому, а і звычайную падмешваюць у сілас. Каб забяспечыць харчовую бяспеку пагалоўя — а ў тым, што зімоўка чакаецца складанай, сумненняў не ўзнікае — на корм, па словах галоўнага раённага агранома, выкарыстоўваецца ўсё, што толькі магчыма. Не пакідаецца без увагі ніводная травінка, скошваюцца поймы, лугі, убіраецца падаліца, якая падымаецца пасля ўборкі яравога рапсу і зерневых. У бліжэйшы час плануецца пасеяць сурэпіцу — найбольш раннюю культуру, якая, разлічваюць, зможа падтрымаць жывёлагадоўлю ўвесну. Насенне для гэтых мэт маецца.

Што датычыцца яравога рапсу, то ён у раёне практычна ўбраны — з плошчы ў 1249 га ўбрана 1138. Намалот склаў 1109 тон, з аднаго круга ўзялі па 10 цэнтнераў. Вядома ж, для ўраджайнага году гэта не лічбы, але, з улікам сённяшняй спякоты, і гэтаму рады.

Паўнамаштабна вядзецца ў раёне ўборка кукурузы на корм жывёле. Па-першае, культуру імкнуцца па максімуме выкарыстаць у якасці зімовага корму. Па-другое — у якасці зялёнай падкормкі ў гэтую пару: спадзявацца на выгарэлую пашу не даводзіцца. На гэты час убрана трэць кукурузных плошчаў пры сярэдняй ураджайнасці 84 ц/га. Між тым убіраюцца пакуль горшыя палі, таму ёсць верагоднасць разлічваць на значна вышэйшыя паказчыкі.

А ў хуткім часе ўсе гаспадаркі прыступяць да капання бульбы. Пакуль гэтым займаюцца толькі ў ТАА “Веом”. Сёння-заўтра ўбіраць клубні стануць у вытворчых кааператывах “Калгас імя Дзяржынскага”, “Гігант”, “Калгас імя А. Неўскага”. Таксама ў гэтыя дні працягваюцца прэсаванне і звозка з палёў саломы. Ад той, што ўбрана, запрэсавана 80 працэнтаў.

Алена КАРПЕНКА. Фото Юрия ЮРКЕВИЧА.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.