Намаганні — на добры ўраджай

На гэты час, як паведаміла намеснік начальніка ўпраўлення сельскай гаспадаркі і харчавання райвыканкама па раслінаводстве Жана Жукоўская, усе гаспадаркі займаюцца нарыхтоўкай травянога корму: рыхтуюць сена, сянаж, а ў СВК “Гігант” і сілас з адналетнікаў.

У цэлым па раёне на раніцу ўчарашняга дня было нарыхтавана каля 2 з паловай тысяч тон сена, болей за 32 тысячы тон сенажу і паўтары тысячы — сіласу. Калі параўноўваць з гэтай парой мінулага года, то сёлета корму нарыхтавана прыкладна на 30-40 працэнтаў меней. І звязана гэта, па словах галоўнага агранома раёна, з засушлівым надвор’ем і як вынік — слабой травой.

У сувязі з тым што першы ўкос ужо завершаны, а другі яшчэ не падыйшоў — нізкія начныя тэмпературы і адсутнасць дажджоў не садзейнічаюць росту раслін — у гаспадарках займаюцца касьбой няўдобіц і пасеяных рана ўвесну на корм жывёле адналетнікаў. Папаўняецца кармавая база ў гэтую пару і за кошт азімых зерневых культур. З-за засушлівага лета многія з іх блізкія да гібелі. Пакуль гэтага не адбылося цалкам, пашкоджаныя палі скошваюцца на корм жывёле. У сувязі з такой няпростай сітуацыяй гаспадаркі ў чэрвені займаліся сяўбой памежных культур — пасеяна болей за 1400 га, якія праз 50-60 дзён можна будзе выкарыстоўваць як для “зялёнай” падкормкі, так і закладкі ў траншэі.

Аналізуючы сітуацыю з нарыхтоўкай корму ў разрэзе гаспадарак, на гэты час, па словах Жаны Жукоўскай, са станоўчага боку можна вылучыць Бабруйскае ААТ “Аграмашсервіс”, дзе дастаткова травянога корму нарыхтавалі і ў мінулым годзе, і сёлета сітуацыя выглядае лепш астатніх. Для параўнання, калі ў сярэднім па раёне на ўмоўную галаву жывёлы нарыхтавана 5 ц.к. адзінак, то ў «Аграмашсервісе» — 11. Другі па велічыні паказчык — у філіяле “Харчавік-Агра” ААТ “Чырвоны харчавік”. На ўмоўную галаву тут маецца каля 10 ц.к. адз.

Што датычыцца іншых сельгасработ, то на гэты час у гаспадарках завяршаюцца мерапрыемствы па доглядзе раслін. У прыватнасці, цалкам апрацаваны яравы рапс супраць кветкаеда, выкананы фунгіцыдныя апрацоўкі на пасевах азімага рапсу, часткова — яравога, вядуцца хімпраполкі цукровых буракоў, кукурузы.

Працягваюцца работы па барацьбе з пустазеллем у садах вытворчых кааператываў “Калгас імя А. Неўскага” і “Калгас імя Дзяржынскага”. Вядуцца і будуць працягвацца работы па барацьбе з хваробамі на бульбяных палях. Дадзенай культуры ў раёне пасаджана дастаткова шмат, каля адной тысячы гектараў. І, вядома ж, неабходна прыкласці ўсе намаганні, каб атрымаць урэшце добры ўраджай.

Алена КАРПЕНКА.

,

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.