30 мая для 1397 школьнікаў раёна празвінеў апошні ў гэтым навучальным годзе званок. Урачыстыя лінейкі з гэтай нагоды, з удзелам прадстаўнікоў раённага выканаўчага камітэта, служб раёна, настаўнікаў і бацькоў школьнікаў, прайшлі ва ўсіх установах адукацыі.

Разам са словамі пажаданняў на “дарослую” дарогу выпускнікам (сярод якіх 85 адзінаццацікласнікаў і 152 вучні дзевятых класаў) поспехаў у здачы школьных экзаменаў, іспытаў цэнтралізаванага тэсціравання і дасягнення пастаўленых мэт у абранні будучай прафесіі — госці пажадалі добрага і цікавага адпачынку тым, для каго ў верасні школы ізноў гасцінна расчыняць свае дзверы. Разам з тым педагогі заклікалі непаўналетніх і іх родных з усёй адказнасцю падыйсці да арганізацыі вольнага часу ў летнія месяцы, бяспечнага адпачынку.

Бацькам першакласнікаў у вырашэнні гэтага пытання сёлета пасадзейнічала Беларуская федэрацыя футбола. У рамках ініцыіраванай федэрацыяй акцыі “Падары дзіцяці футбольны мяч” 145-ці вучням першых класаў раённых школ падчас развітальнай лінейкі ўручаны гэты спартыўны інвентар.

Алена КАРПЕНКА.