У чацвер на мінулым тыдні ў райвыканкаме працаваў пашыраны Прэзідыум Савета Бабруйскага раённага аб’яднання прафсаюзаў з запрашэннем старшынь пярвічных прафсаюзных арганізацый галіновых прафсаюзаў і сацыяльных партнёраў. На павестцы дня стаяла адно пытанне — “Аб выніках VII з’езда Федэрацыі прафсаюзаў Беларусі”.

Трымаючы слова перад удзельнікамі пасяджэння, старшыня раённага аб’днання прафсаюзаў Л.В. Крычко, якая была дэлегатам з’езда ад нашага раёна, распавяла аб рабоце высокага форума, звароце да яго ўдзельнікаў Прэзідэнта Беларусі А.Р. Лукашэнкі і аб пастаўленых кіраўніком ФПБ М.С. Ордай задачах перад прафсаюзнымі арганізацыямі на перспектыву.

Падчас пасяджэння Прэзідыума Савета Бабруйскага раённага аб’яднання прафсаюзаў была выпрацавана пастанова, у адпаведнасці з якой вырашана кіравацца ў сваёй далейшай рабоце рашэннямі VII з’езда Федэрацыі прафсаюзаў Беларусі і Праграмай дзейнасці Федэрацыі прафсаюзаў Беларусі на 2015-2020 гады; забяспечыць сумесна з сацыяльнымі партнёрамі рэалізацыю даручэння Прэзідэнта краіны ў часцы стварэння новых прафсаюзных арганізацый, перш за ўсё ў прыватным сектары эканомікі; удзяляць асаблівую ўвагу эфектыўнасці работы старшынь пярвічных прафсаюзных арганізацый, вылучэнню на дадзеныя пасады актыўных, ініцыятыўных людзей, якія адстойваюць інтарэсы чалавека працы.

Алена КАРПЕНКА.