Веснавыя палявыя работы ў раёне набіраюць абароты. Па стану на раніцу ўчарашняга дня, як паведамілі ва ўпраўленні сельскай гаспадаркі і харчавання райвыканкама, ранняй ярыной ужо было засеяна каля 1000 гектараў з дзевяці запланаваных на гэты год. Праўда, яшчэ болей за 800 га прыйдзецца перасеяць азімых.

Першымі да сяўбы ў гэтую весну прыступілі земляробы філіяла «Харчавік-Агра» ААТ «Чырвоны харчавік», дзе на сёння пасеяна амаль палова адведзеных пад раннюю ярыну плошчаў. У гаспадарцы цалкам унеслі ў глебу насенне аўсу і займаюцца сяўбой ячменю. Актыўна сёлета ўключыліся ў пасяўную кампанію аграрыі ААТ «Агракамбінат «Бабруйскі». Па апошніх дадзеных у гаспадарцы ўжо пасеяна болей за 600 га, ці трэць запланаваных плошчаў. Распачалі гэтыя работы таксама ў СВК «Гігант», дзе зараз сеюць зернебабовыя культуры на адналетнія травы, і ў філіяле «Варатынь» ААТ «БЗТДіА». У некаторых сельгасарганізаціях з-за перабоеў з палівам і неабходнасцю ў ворыўных работах адлік сяўбе не пачыналі. Аднак замінка з палівам на гэты час ліквідавана, і ў сельгасарганізацыях актыўна займаюцца ворыўнымі работамі, пашыраюць плошчы падрыхтаванай глебы, каб потым цалкам пераключыцца непасрэдна на сяўбу. Што датычыцца веснавога ворыва, то яно вядзецца не ўсюды: у «Гіганце» пра гэта паклапаціліся ўвосень, у філіялах «Харчавік-Агра» і «Варатынь» ворыўныя работы ўжо завяршылі. А вось падрыхтоўкай глебы пад ярыну — культывацыяй, дробным дыскаваннем — займаюцца ва ўсіх без выключэння сельгаспрадпрыемствах. У цэлым па раёне падрыхтавана 30 працэнтаў плошчаў. Сёлета, як і ў папярэднія гады, глеба здабляецца мінеральнымі ўгнаеннямі. Праўда, з улікам таго, што апошніх не дастае пад поўную патрэбу, нормы ўнясення некалькі зніжаны. А на палях, дзе ў мінулыя гады шчодра ўносіўся хлорысты калій і фосфар, якія маюць здольнасць назапашвацца ў глебе і на працягу шэрагу год утрымлівацца у ёй, мінералы ўносяцца па мінімуму, што, на думку спецыялістаў, не перашкода для будучага ўраджаю.
Вялікая стаўка сёлета — зноў жа, як і ў мінулым годзе, робіцца на арганіку. З плану ў 317 тысяч тон пад сёлетнюю сяўбу яе нарыхтавана 100 працэнтаў, 270 тысяч тон ужо на палях, каля 100 тысяч унесена ў глебу. Арганічныя ўгнаенні ў асноўным ўносілі ўвосень пад бульбу. Цяпер імі ўгнойваюцца кукурузныя палі. З улікам таго, што кукурузу сеюць пазней ранняй ярыны, у аграрыяў яшчэ маецца час, каб гэтую работу давесці да канца.

Алена КАРПЕНКА.