З вясной работ прыбавілася
Аблашчаная першым веснавым сонейкам зямля запатрабавала да сябе ўвагі, і, вядома ж, земляробы на гэта адгукнуліся.
На гэты час у раёне, як паведаміла намеснік начальніка ўпраўлення сельскай гаспадаркі і харчавання па раслінаводстве райвыканкама Жана Жукоўская, ужо вядуцца веснавыя палявыя работы. Працягваецца вывазка на палі і ўнясенне ў глебу арганікі, вядуцца ворыўныя работы. Вызваленая ад вільгаці зямля дазваляе падрыхтаваць глебу да сяўбы. Гэтым актыўна займаюцца ў ААТ «Агракамбінат «Бабруйскі», дзе толькі веснавога ворыва маецца ўжо 600 га. Прыступілі да дадзеных работ таксама ў філіяле «Харчавік-Агра» ААТ «Чырвоны харчавік». Практычна ва ўсіх сельгасарганізацыях займаюцца ўнясеннем пад яравую сяўбу калійных угнаенняў. У асобных гаспадарках, у прыватнасці, у СВК «Калгас імя Дзяржынскага», ААТ «Саўгас Кісялевічы» і філіяле «Харчавік-Агра» пачалі падсейваць мнагалетнія травы: канюшыну і бабова-злакавыя сумясі. На ўчарашнюю раніцу было падсеяна 572 га.
За клопатамі пра веснавую сяўбу ў гаспадарках не забываюцца на догляд азімых культур. З учарашняга дня пачалася іх падкормка (зерневых і рапсу) азотнымі мінеральнымі ўгнаеннямі. Нягледзячы на праблемы з набыццём апошніх, выкліканыя высокай цаной на іх, неабходная для першай падкормкі колькасць азотных угнаенняў, як паведамілі ў райсельгасхарчы, у раёне маецца. У сувязі з тым, што практычна палова пасеваў азімага рапсу падчас зімы загінула і прынята рашэнне перасеяць яго яравым, гэтым часам вырашаюцца пытанні з набыццём неабходнага для гэтых мэт насення.
У яблыневых садах вядзецца веснавая абрэзка дрэўцаў.
Алена КАРПЕНКА.