Галоўная задача — нарошчваць аб’ёмы вытворчасці

Пачатак кожнага новага года — гэта падвядзенне вынікаў напрацаванага ў мінулым і планаванне, з улікам тых жа вынікаў — іх станоўчага і адмоўнага вопыту — работы ў далейшым. Апошняе датычыцца любой галіны вытворчасці і жывёлагадоўлі ў тым ліку. Варта адзначыць, што для малочнай галіны раёна 2014 год быў няпростым: сітуацыя з вытворчасцю і рэалізацыяй малака стабілізавалася, як адзначыў у нашай з ім размове намеснік начальніка ўпраўлення сельскай гаспадаркі і харчавання райвыканкама Сяргей Мянькоўскі (на фота), толькі напрыканцы года. Гэтаму садзейнічала немалая работа ў дадзеным накірунку як збоку кіраўніцтва раёна, так і райсельгасхарчу, і больш адказнаму падыходу да арганізацыі вытворчага працэсу ў саміх сельгасарганізацыях. Але пра ўсё папарадку.
DSC_0033
— Сяргей Мікалаевіч, з пазіцыі новага года, як можаце ахарактарызаваць адыйшоўшы — маю на ўвазе ў першую чаргу малочную галіну, і як складваюцца паказчыкі ўжо сёлета?

— Лічбы, калі глядзець па выніках мінулага года, у нас не самыя лепшыя ў вобласці, але ж і нядрэнныя. 2014 год завяршылі адносна паспяхова, “падцягнулі” многія паказчыкі, у асаблівасці за апошні квартал года — па вытворчасці і рэалізацыі малака, па валавых прывагах буйнарагатай жывёлы.
На гэты час усе гаспадаркі працуюць станоўча — маю на ўвазе штодзённую рэалізацыю малака, бо гэта, як кажуць, “жывыя” грошы. Да ўзроўню мінулага года ў цэлым па раёне рэалізацыя штодня складае 119 працэнтаў. Але гэтым не задавольваемся. На бягучы месяц вобласцю пастаўлена задача давесці рэалізацыю да 125 працэнтаў у параўнанні да мінулага года. Разумеючы важнасць гэтай задачы, прыкладваем усе намаганні, каб яе вырашыць: працуем з калектывамі, нац­э­ль­ваем спецыялістаў і работнікаў галіны на безагаворачнае выкананне ўсіх тэхналагічных патрабаванняў і тым самым — на дасягненне пастаўленай мэты, павелічэнне выручкі, паляпшэнне фінансавага стану гаспадарак, а значыць, і працаўнікоў.
Актыўна працуем па якасці малака: і час, і сітуацыя на рынку гэта дыктуюць. Каб прадукцыя адпавядала экспартным патрабаванням, малако павінна быць якасным, а апошняе, як вядома, залежыць у першую чаргу ад вытворцаў.

— Ну і гэта ж таксама “жывыя” грошы для гаспадарак?

— Так. Розніца ў цане паміж гатункамі малака даволі прыкметная, а паміж вышэйшым і “экстра” — увогуле значная. На выручку ад продажу малака ўплывае і ягоная тлустасць. Базавая на сёння — 3,6 працэнта. Больш тлустае малако — дадатковыя грошы, таму так важна трымаць на кантролі гэты паказчык. Таксама дадатковыя грошовыя сродкі здольны прыно­сіць бялок: чым болей яго ўтрымліваецца ў малаку, тым апошняе цаннейшае.

— А бялок ад чаго зале­жыць? Што здольна ўплываць на ягоную колькасць у каштоўным прадукце? Упэўнена, кожны работнік фермы гэта ведае, і ўсё ж…

— Малако — гэта вынік работы арганізма жывёлы. А работа гэтая ў сваю чаргу залежыць ад таго, як мы жывёлу накормім. Таму ўвесь сакрэт — у наяўнасці якаснага корму, пэўнага яго складу, рацыёну. Рацыён каровы павінен быць збалансаваным па асноўных харчовых рэчывах, корм павінен быць пэўнай вільготнасці, у час падавацца жывёле на кармавы стол… Гэта значыць, неабходна строга прытрымлівацца тэхналогіі кармлення і ўтрымання жывёлы, да чаго мы настойліва заклікаем працоўныя калектывы і чаго патрабуем ад кожнага, занятага ў вытвор­часці. ­

— На вашу думку, ад каго ў гаспадарцы ў асноўным залежыць вынік работы ў жывёлагадоўлі, той жа малочнай галіне — ад кіруючага складу, спецыялістаў ці непасрэдна работнікаў ферм: аператараў машыннага даення, даглядчыкаў?

— Вынік залежыць — і я заўсёды гэта гавару — ад усяго вытворчага звяна. Калі яно, пачынаючы ад начнога вартаўніка да кіраўніка сельгасарганізацыі, працуе зладжана — тады і паказчыкі станоўчыя, і заробак расце. Калі ж такой зла­джанасці няма — на вынік станоўчы не прыходзіцца разліч­ваць, яго не будзе. Выдзяляць некага аднога з гэтага звяна не бяруся: толькі сумленная праца ўсіх і кожнага.

— І ўсё ж накірунак у рабоце гэтага звяна, тон яго рабоце задае, згадзіцеся, кіраўнік. Станоўчы вынік хутчэй — а то і толькі — будзе дасягнуты там, дзе кіраўнік — гаспадар і ініцыятар. Зацікаўлены ў выніках работы начальнік заўсёды, як мне здаецца, знойдзе спосаб, як перадаць гэтую ініцыятыву работніку, заахвоціць яго і тым самым прывучыць чалавека працаваць, нацэ­ліць яго на паляпшэнне вытворчасці працы… Ну і вяртаючыся да звенняў — на ваш погляд, дзе яны сапраўды трывалыя?

— Калі аналізаваць па выніках работы на гэты час, то добра працуе ў нас філіял “Харчавік-Аг­ра” ААТ “Чырвоны харчавік”, нядрэнныя паказчыкі ў філіяле “Варатынь” ААТ “БЗТДіА”. Радуе ў апошні час ААТ “Агракамбінат “Бабруйскі”. Там наладзілі тэхналогію кармлення і ўтрымання жывёлы, дысцыпліну ўзялі пад кантроль. Больш за 4 тоны малака гаспадарка штодня пастаўляе на перапрацоўку болей, чым у мінулым годзе, а гэта, нават калі лічыць па вышэйшым гатунку, 16 мільёнаў дадатковай выручкі кожны дзень.

— А якім сельгасарганізацыям у гэтым плане трэба яшчэ працаваць ?

— Па выніках мінулага года, па вытворчасці і рэалізацыі малака, “з мінусам” да папярэдняга года спрацавалі ў СВК “Калгас імя Дзяржынскага” і “Калгас імя А. Неўскага”. Акрамя таго, што дадзеныя сельгасарганізацыі маюць патрэбу ў кадрах спецыялістаў, тут мелі месца выпадкі парушэнняў вытворчай дысцыпліны. Зачастую і спецыялісты, і работнікі ферм пагарджалі рэгламентам па вытворчасці малака. Хацелася б, каб сёлета сітуацыя ў гэтых гаспадарках выправілася.

— Некалькі слоў пра свінаводства. Як вядома, Прэзідэнт краіны паставіў задачу няўхісна нарошчваць пагалоўе свіней. Якая перспектыва развіцця дадзенай галіны ў раёне?

— Задача — узмоцнена развіваць свінаводства, нарошчваць пагалоўе свіней, пастаўлена і Прэзідэнтам, і абласным, і раённым кіраўніцтвам. Мы прыступілі да яе рэалізацыі. У гэтым годзе адна свінатаварная ферма будзе рэканструявацца, яшчэ адну, адноўленую, ужо запусцілі ў СВК “Гігант”. У гэтай жа гаспадарцы плануецца будаўніцтва яшчэ і свінакомплекса. Таксама вырашаецца пытанне аб узвядзенні свінатаварнага комплекса Бабруйскім КХП. Такім чынам сёлета плануем пачаць “з нуля” будаўніцтва яшчэ двух аб’ектаў.

— Ці закране мадэрнізацыя іншыя галіны жывёлагадоўлі ў гэтым годзе?
— У планах ёсць. Па-першае, разлічваем пачаць узвядзенне радзільнага аддзялення і цялятніка на базе філіяла “Варатынь”: там і магутнасці дазваляюць, і ўвогуле гаспадарцы трэба пашырацца ў гэтым плане. Жывёлагадоўля ў іх добра развіваецца, пагалоўя дастаткова, а месцаў у дэфіцыце. Акрамя таго, ёсць у нас неколькі незапоўненых аб’ектаў, якія плануем запоў­ніць. А ў цэлым ставім задачу — за кошт наладжанай работы ва ўсіх сельгасарганізацыях па аднаўленні статку і яго захаванасці павялічыць пагалоўе жывёлы ў раёне. У мінулым годзе нам гэтага таксама ўдалося дасягнуць, хоць і не на шмат, ну а сёлета разлічваем — і ўсё для гэтага робім, каб прырост быў значным.

— Жадаем, каб усе планы, накіраваныя на развіццё раёна і павышэнне ўзроўню жыцця вяскоўцаў, ажыццявіліся. Дзякуй вам, Сяргей Мікалаевіч, за размову.

Алена КАРПЕНКА.
Фота Сяргея ПАДАЛЯКА.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.