14 студзеня ў горадзе на Бярэзіне стартаваў XII штогодны адкрыты турнір па міні-футболе, валейболе і пажарным спорце на кубак старшыні Бабруйскага гарадскога выканаўчага камітэта сярод падраздзяленняў пажарных-ратавальнікаў, прымеркаваны да іх прафесійнага свята. Урачыстасць з гэтай нагоды прайшла ў гарадскім Палацы мастацтваў.
Адкрываючы турнір, старшыня Бабруйскага гарвыканкама Андрэй Каваленка падзякаваў работнікам Міністэрства па надзвычайных сітуацыях за іх вельмі патрэбную і высакародную справу — выратоўваць чужое жыццё, якую, як ён адзначыў, “немагчыма пераацаніць”: уступаючы ў бітву з агнём, ратавальнікі штораз ставяць на кон сваё здароўе. Павіншаваў іх з надыходзячым прафесійным святам, пажадаў поспехаў і добрага настрою ўдзельнікам турніру і выказаў спадзяванне, што горад на Бярэзіне пакіне ў гасцей самыя цёплыя пра сябе ўспаміны.
Намеснік Міністра па надзвычайных сітуацыях, палкоўнік унутранай службы Аляксандр Худалееў, які таксама прыняў удзел у мерапрыемстве, заўважыў, што “кожныя дзве гадзіны супрацоўнікамі МНС у нашай краіне выратоўваецца чалавечае жыццё, кожную гадзіну органы і падраздзяленні ратавальнікаў учыняюць не меней пяці выездаў на выкананне баявых заданняў”. Намеснік Міністра завастрыў увагу на станоўчых выніках яднання спорту і баявой работы ратавальнікаў, якое прыводзіць да росту прафесіяналізму апошніх, пажадаў і цяперашнім работнікам міністэрства, і ветэранам службы, іх сем’ям здароўя і ўсяго найлепшага.
З прыветнымі словамі да работнікаў МНС звярнуўся таксама намеснік начальніка Магілёўскага абласнога упраўлення МНС, падпалкоўнік унутранай службы Канстанцін Іваноў. Ад прадстаўнікоў замежных дэлегацый выступіў начальнік пажарна-ратавальнага ўпраўлення Вільнюскага ўезда Рымантас Сцепанавічус, які ўручыў начальніку Бабруйскага гаррайаддзела па НС Андрэю Бабіну сімвалічны сувенір. На свяце прысутнічалі таксама дэлегацыі Латвіі, Польшчы, Украіны. Усіх іх горача прывіталі, гэтак жа як і ўдзельнікаў турніру ад Беларусі. Нашу краіну сёлета прадстаўляюць каманды Маладзечанскага (Мінская вобл.) і Наваполацкага (Віцебская вобл.) гаррайаддзелаў па НС, каманда Рэспубліканскага атрада спецыяльнага прызначэння, Рэчыцкага райаддзела па НС (Гомельская вобл.), Камандна-інжынернага інстытута МНС, Гродзенскага гараддзела па НС і, вядома ж, бабруйскія каманды.
На адкрыцці турніра па традыцыі не абыйшлося без узнагароджванняў. Ганаровых грамат, грашовых прэмій удастоіўся не адзін дзясятак прадстаўнікоў мужнай прафесіі. А некаторыя з іх атрымалі чарговыя званні.
У канцэртнай зале панавала ўзрушанасць, не было канца апладысментам, якія гучалі і ў адрас непасрэдных віноўнікаў урачыстасці, і ў адрас тых, хто прыйшоў падараваць ім цудоўныя хвіліны адпачынку — артыстаў на сцэне, іх таленту і майстэрству.
Турнір пачаўся, па магчымасці, будзем сачыць за яго ходам. Спартыўнага настрою і поспехаў хочацца пажадаць усім удзельнікам спаборніцтваў, праўда, нашым хлопцам (спадзяемся, іншыя на нас за гэта не пакрыўдзяцца) — крышачку-крышачку болей.

Алена КАРПЕНКА.
Фота Сяргея ПАДАЛЯКА.