Прэм’ер-міністр Міхаіл Мясніковіч наведаў Бабруйск

Пятніцу 15 жніўня старшыня Савета Міністраў Беларусі Міхаіл Мясніковіч прысвяціў знаёмству з ходам мадэрнізацыі ў ААТ”Белшына”, праграму якой сам і зацвердзіў роўна год таму знаходзячыся на прадпрыемстве. На думку кіраўніка ўрада, тэхнічнае пераўззбраенне, змяненне эканамічных падыходаў адбываецца на ўсіх трох заводах акцыянернага таварыства. Але працаваць трэба лепш, бо тэрміны і аб’ёмы мадэрнізацыі карэктыравацца не будуць – яна павінна завяршыцца ўжо ў наступным годзе. Асаблівую ўвагу неабходна звярнуць на асваенне выпуску канкурэнтаздольных легкавых шын новых памераў, сельскагаспадарчых шырокапрофільных з малым удзельным ціскам на глебу пакрышак і перспектыўных звышбуйнагабарытных шын для кар’ернай тэхнікі. Усё гэта патрабуе ўкаранення не толькі перадавых тэхналогій і абсталявання, а і кадравага абнаўлення.

У ААТ “Легпрамразвіццё” прэм’ер-міністру спадабаліся сучасныя лініі швейнай вытворчасці, арганізацыя працы амаль тысячнага калектыва, сярэднемесячны заробак у якім складае пяць мільёнаў рублёў.

Пабываў Міхаіл Мясніковіч і на школьным базары, разгорнутым у раёне плошчы Перамогі. Гама узораў адзення і цэн на яго, што прапануе легпрам, задаволіць густы як рабят, так і іх бацькоў – зрабіў выснову старшыня ўрада.

Прэм’ер-міністра ў паездцы суправаджалі губернатар Магілёўшчыны Пётр Руднік, старшыня Бабруйскага гарвыканкама Андрэй Каваленка, іншыя афіцыйныя асобы.

Кветкі новаму кіраўніку горада

Першая штотыднёвая планёрка, якую ў мінулы панядзелак у якасці старшыні гарвыканкама праводзіў Андрэй Каваленка, пачалася для яго з кветак – першы віцэ-мэр Алег Ковель ад імя ўсіх калег павіншаваў Андрэя Віктаравіча з днём нараджэння.

Новы год настае, навучальны

Як паведаміла начальнік упраўлення адукацыі, спорта і турызма гарвыканкама Ірына Рынейская, спецыяльна створаная камісія завяршыла праверку гатоўнасці школ горада да навучальнага года. Выяўленыя недахопы павінны быць ухілены ўжо сёння. Кіраўнік Бабруйска Андрэй Каваленка прапанаваў паўдзельнічаць у падрыхтоўцы школьных памяшканняў да нармальнай работы адміністрацыям раёнаў, прадпрыемствам горада, звярнуўшы асаблівую ўвагу на стварэнне ўмоў бяспекі. Гэткую ж задачу ён паставіў і ў адносінах інтэрнатаў усіх навучальных устаноў Бабруйска.

Верная прыкмета будучай зімы – раскопкі

Што называецца, свежым вокам убачыў занадта шмат месц рамонту цеплатрас у горадзе яго новы мэр і запытаў у дырэктара прадпрыемства цеплаэнергетыкі Уладзіміра Аўдзевіча пра сітуацыю. Той запэўніў, што да пачатку ацяпляльнага сезону ўсё будзе прыведзена ў парадак. Сёння пры заданні ў 12,5 кіламетра заменена ўжо 5 кіламетраў труб, у рабоце знаходзяцца больш 2 кіламетраў трубаправодаў. Зараз камлектуюцца цеплатрасы да бальніцы імя У.В.Марзона і ад цэнтральнага цеплапункта №11.

Ці давяслуюць сённяшнія чэмпіёны да ўласнай базы?

На чэмпіянаце свету па веславанні на байдарках і каноэ сярод студэнтаў, што завяршыўся нядаўна ў Заслаўі пад Мінскам, зноў вызначыліся выхаванцы бабруйскай школы веславання, якія заваявалі пяць залатых і тры бронзавыя медалі. Побач з вядомымі Андрэем Багдановічам і Максімам Пятровым на п’едэстале гонару добра глядзеліся Руслан Сазанавец і Дзяніс Махлай. І ўсіх іх непакоіць пытанне: калі ж у Бабруйску будзе пабудавана сучасная вяслярная база, пра якую гэтулькі гаварылася?

Футбол: нечакана дачакаліся

Доўгачаканай балельшчыкамі перамогай нечакана парадавала ў апошнім туры футбольнага чэмпіянату краіны “Белшына”, перагуляўшы салігорскі “Шахцёр” з лікам 2:1. Зараз бабруйская каманда заняла перадапошні радок у турнірнай табліцы, а магілёўскі “Днепр” замкнуў яе. З гэтай нагоды мэра горада на Бярэзіне – вылучэнца з абласнога цэнтра – нават павіншавалі калегі з Магілёва. А што, можа, сапраўды ў футбольнай “Белшыны” пачынаецца новы, больш удалы перыяд?

Белы Бераг і белая зайздрасць

Ва ўрочышчы Белы Бераг на маляўнічым берагу Бярэзіны завяршыўся штогадовы летні злёт моладзі Бабруйска і Магілёва, арганізаваны адпаведнымі камітэтамі БРСМ. Рабяты цудоўна правялі час, спаборнічаючы на спартыўных пляцоўках, раскрываючы здольнасці ў конкурсах, спяваючы ля кастра. І хаця ў агульным заліку ўсе прызавыя месцы дасталіся бабруйскім камандам – ААТ “Славянка”, ААТ”Белшына”, заводаў біятэхналогій і машынабудаўнічага, перамагла, як звычайна, дружба. Магілеўчане калі і пазайздросцілі, дык толькі па-беламу.

 Аляксандр Бяляеў.