З 12 ліпеня ў сталіцы нашай дзяржавы праходзіла нямецка-беларуская сустрэча навучэнцаў гімназій з горада Маладзечна Мінскай вобласці і населенага пункта Тауха (Германія), арганізаваная Народным саюзам Германіі па доглядзе за ваеннымі магіламі. З 18 па 20 ліпеня удзельнікі сустрэчы наведалі наш раён, дзе не толькі знаёміліся з краявідамі гасціннай Бабруйшчыны, але і займаліся навядзеннем парадку і чысціні на тэрыторыі Кургана Славы ў Сычкава.

Як заўважыў адзін з кіраўнікоў сустрэчы, прадстаўнік беларускага боку Іван Вішнякоў, дадзены праект накіраваны на прапаганду міру, на ўзаемапаразуменне паміж народамі, якіх аб’ядноўвае агульная трагічная старонка ў гісторыі – Другая сусветная вайна.
На ўрачыстасці, якая прайшла ля Кургана славы ў суботу і падчас якой удзельнікі міжнароднага маладзёжнага лагеру ўсклалі да падножжа кургана вянкі і кветкі, да моладзі звярнулася намеснік старшыні райвыканкама С.С. Носава. Яна адзначыла, што і беларускім урадам, і Народным саюзам Германіі зроблена і робіцца шмат для таго, каб, памятаючы сусветную трагедыю, нашыя народы будавалі добрасуседскія адносіны, якія дазваляюць моладзі сустракацца, бавіць час разам, знаёміцца з культурай і гісторыяй Беларусі і Германіі. Намеснік старшыні райвыканкама падзякавала юнакам і дзяўчатам за працу, за тое, што знайшлі магчымасць наведаць раён, і ўручыла Ліст удзячнасці ад кіраўніка раёна А.В. Осіпава.
Кветкі і вянкі былі ўскладзены ў гэты дзень і да крыжа на нямецкіх могілках у Шчаткава. Згадваючы трагічную старонку ў гісторыі абодвух народаў, беларускія і нямецкія школьнікі гаварылі пра тое, што любая вайна – супрацьчалавечная: прыносіць у сем’і гора і роспач, аддаляе народы, сее паміж імі варожасць, перашкаджае знаёмству з культурай, і пра пра тое, што людзей павінны аб’ядноўваць узаемапавага і імкненне да міру. На запытанне, якія ўражанні ад знаходжання на беларускай зямлі, нямецкі школьнік Макс адказаў наступнае:
— Я рады, што пабываў у Беларусі. Гэта прыгожая краіна з дабразычлівымі і ветлівымі людзьмі. Разам з іншым мы сочым за навінамі, тым, што адбываецца зараз ва Украіне, і яшчэ больш упэўніваемся, што ў аснове адносінаў паміж народамі павінна быць узаемапаразуменне, якое не дазваляе адбыцца трагедыі, і той, што цяпер ва Украіне, і той, чым стала для людзей Другая сусветная вайна. Якраз-такі ў гэтым — узаемапаразуменні — мэта праекту, у якім мы ўдзельнічаем.
…Гора і адчай тысяч сем’яў, слёзы болю і роспачы несуцешных матуль захоўваюць магілы і воінскія захаванні салдат. Такі вынік жудаснай трагедыі, дапушчанай самімі ж людзьмі. І менавіта ад людзей — цяперашняга і будучага пакаленняў, прадстаўнікамі якога з’яўляюцца ў тым ліку беларускія і нямецкія школьнікі, якія пабывалі на бабруйшчыне ў мінулыя выхадныя, залежыць — не дапусціць гэтага ізноў.

Алена КАРПЕНКА.
Фота аўтара.