Да Дня горада – ўсё лепшае
Працягваюцца работы па ўзвядзенні помніка ўсім загінуўшым у Бабруйскай крэпасці, праект якога распрацаваны ў творчай садружнасці Галінай і Леанідам Левінымі. На жаль, лаўрэат Ленінскай прэміі аўтар мемарыяльнага комплекса ў Хатыні Леанід Мендзелевіч нядаўна пайшоў з жыцця. Але і Галіна Леанідаўна, і арганізатары сёлетняга святкаваня 70-годдзя вызвалення Бабруйска і Беларусі ад нямецка-фашысцкіх захопнікаў абяцаюць, што мемарыял непадалёк ад “Бабруйск-Арэны” з’явіцца ў тэрмін.
Да Дня горада пасвяжэе і плошча Перамогі, на добраўпарадкаванне якой з гарбюджэта выдаткавана больш за 600 мільёнаў рублёў. З навінак у мерапрыемствах, прысвечаных юбілею, чакаецца ўдзел мажарэтак-барабаншчыц, калектыў якіх будзе створаны з выхаванак школы-каледжа мастацтваў.
Новы кіраўнік экалагічнай інспекцыі
У панядзелак на гэтым тыдні першы намеснік старшыні гарвыканкама Алег Ковель прадставіў удзельнікам планёркі новага кіраўніка гарадской і раённай інспекцыі прыродных рэсурсаў і аховы навакольнага асяроддзя, прызначанага загадам галіновага міністра. Ім стаў Дзмітрый Дземенкавец, які працаваў раней начальнікам аддзела Магілёўскага абласнога аб’яднання “Мясамалпрам”.
Няхай больш будзе пацыентаў у гэтых палатах
Цудоўны падарунак напярэдадні майскіх святаў атрымалі бабруйчане і жыхары пяці навакольных раёнаў, для якіх адчыніў дзверы новы корпус рэканструяванага радзільнага дома. Да паслуг парадзіх 6 радзільных залаў, 3 аперацыйныя, дзіцячае і дарослае рэанімацыйныя аддзяленні, зручныя палаты на 60 ложкаў. Усяго на плошчы больш за 5300 кв. м можна аказваць родадапамогу ў прыняцці не менш 3500 немаўлят у год. А ўстаноўленае тут сучаснае абсталяванне дазваляе выходжваць нованароджаных з вагой нават у 500 грамаў. Дарэчы, інкубатар для догляду менавіта гэткіх дзіцянят падарыў радзільнаму дому міністр аховы здароўя нашай краіны Васіль Жарко. А губернатар Магілёўшчыны Пётр Руднік зрабіў прэзент у выглядзе апарата штучнага вентылявання лёгкіх, пажадаўшы, каб дом, дзе нараджаецца шчасце, ужо сёлета “выйшаў на праектную магутнасць”.
Прэміі актывістам выбараў
Першы віцэ-мэр Бабруйска Алег Ковель уручыў днямі грашовыя прэміі гарвыканкама найбольш актыўным удзельнікам падрыхтоўкі і правядзення выбараў у мясцовыя Саветы 27-га склікання. Сярод узнагорджаных старшыня гарадской выбарчай камісіі Віктар Гарбанёў, супрацоўнікі ўпраўлення ўнутраных спраў гарвыканкама Аляксандр Сяргееў, Сяргей Рудзько, Аляксандр Кастаянскі, начальнікі аддзелаў адміністрацый Ленінскага і Першамайскага раёнаў Валянціна Афанасенка і Аляксандр Адзіночанка.
Госці горада на Бярэзіне
На тыдні чакаецца прыезд у Бабруйск міністра працы і сацыяльнай абароны насельніцтва Рэспублікі Беларусь Марыяны Шчоткінай, якая наведае прадпрыемства Беларускага таварыства інвалідаў па зроку і мясакамбінат. Таксама у горадзе на Бярэзіне пройдзе рэспубліканскі семінар “Арганізацыя адукацыйнага працэса” з удзелам супрацоўнікаў Міністэрства адукацыі нашай краіны.
Незвычайны канцэрт да Свята Перамогі
Аб сапраўднай усенароднасці Свята Вялікай Перамогі сведчыць, мяркую, адзін з шматлікіх канцэртаў, які прайшоў напярэдадні 9 Мая. Адбыўся ён у клубе выпраўленчай калоніі №2, што размешчана ў Бабруйску. Кіраўніцтва яе арганізавала ўрачыстасць для ветэранаў і супрацоўнікаў рэжымнай установы, запрасіўшы іх прама на яе тэрыторыю. Калег цёпла павіншаваў начальнік выпраўленчай калоніі Аляксандр Какунін. А затым на добра аздобленай сцэне сваё майстэрства паказалі спевакі і дэкламатары як з ліку людзей у пагонах, так і з асуджаных да тэрмінаў пазбаўлення волі. Але і яны, як падалося, былі шчырымі ў выказванні пачуццяў павагі і ўдзячнасці да савецкіх воінаў, што ўратавалі свет ад карычневай чумы.
“Зялёнае жніво” пачалося…
…але не на сельскагаспадарчых угоддзях, а ў горадзе. Як паведаміла галоўны дзяржаўны санітарны ўрач Бабруйска Валянціна Парахневіч, менавіта зараз наступіла пара падкосу траў і пустазелля на шматлікіх газонах, прыдарожных палосах і прысядзібных тэрыторыях. Дырэктар дарожна-экплуатацыйнага прадпрыемства Сяргей Грэбень у сваю чаргу запэўніў, што да гэтай работы ужо падрыхтаваны дзве трактарныя касілкі, не менш двух дзясяткаў касцоў і неабходны транспарт.
Аляксандр Бяляеў.