З 1-га красавіка сёлетняга года да іншых відаў жылля, якія ўваходзяць у дзяржаўны жыллёвы фонд, далучылася яшчэ і “камерцыйнае”. Што гэта за жыллё, ці маецца яно на тэрыторыі нашага раёна, у колькі абыдзецца наймальнікам і, што немалаважна, ці будзе магчымасць такое жыллё прыватызаваць — усім гэтым, улічваючы павышаны інтарэс чытачоў да жыллёвай тэмы і маючы намер папярэдзіць пытанні, якія могуць узнікаць, мы пацікавіліся ў начальніка аддзела жыллёва-камунальнай гаспадаркі Бабруйскага райвыканкама І.Г. Пракопчык.

— Ірына Генадзеўна, ці маецца так званае камерцыйнае жыллё ў нашым раёне?

— Маецца. Прэзідэнтам Рэспублікі Беларусь быў падпісаны Указ № 563 «Аб некаторых пытаннях прававога рэгулявання жыллёвых адносін”, накіраваны менавіта на развіццё фонду жылых памяшканняў камерцыйнага выкарыстання дзяржаўнага жыллёвага фонду. Згодна дадзенага Указа ў нашым раёне мясцовымі выканаўчымі і распарадчымі органамі праведзена немалая работа па фарміраванні такога фонду за кошт уключэння ў яго склад 19-ці службовых жылых памяшканняў, з якіх 3 значыліся на балансе УКП “Жылкамгас”, 2 — на ўліку БДПЛ №13, 13 памяшканняў — ААТ “Саўгас Кісялевічы” і 3 — на балансе ААТ “Агракамбінат “Бабруйскі”. Такім чынам, з 1-га красавіка сёлетняга года дзяржаўны жыллёвы фонд уключае ў сябе 5 відаў жылых памяшканняў: жылыя памяшканні сацыяльнага карыстання, жылыя памяшканні ў інтэрнатах, спецыяльныя жылыя памяшканні, жылыя памяшканні камерцыйнага выкарыстання і жылыя памяшканні дзяржаўнага жыллёвага фонду, прадастаўленыя грамадзянам па дагаворах найму жылога памяшкання дзяржаўнага жыллёвага фонду. Адзначу і тое, што да 1 ліпеня 2016 года прадугледжана ўключэнне жылых памяшканняў дзяржаўнага жыллёвага фонду (акрамя жылых памяшканняў сацыяльнага карыстання, у інтэрнатах, службовых і спецыяльных службовых жылых памяшканняў, жылых памяшканняў камерцыйнага выкарыстання, а таксама жылых памяшканняў у адміністрацыйных і грамадскіх збудаваннях органаў і падраздзяленняў па надзвычайных сітуацыях) у склад жылых памяшканняў камерцыйнага выкарыстання і адпаведна дзяржаўны жыллёвы фонд будзе ўключаць 4 віды жылых памяшканняў: памяшканні сацыяльнага карыстання, у інтэрнатах, спецыяльныя і камерцыйнага выкарыстання.

— Са зменай статусу жылля — маю на ўвазе пераход у камерцыйнае — як вырашаны прававы бок гэтага з наймальнікамі і, што асабліва цікавіць — у колькі такое жыллё чалавеку абыдзецца?

— З наймальнікамі вышэйпазначаных жылых памяшканняў заключаны новыя дагаворы найму, цяпер ужо жылых памяшканняў камерцыйнага выкарыстання. Плата за карыстанне складае 0,2 базавай велічыні за 1 м.кв. агульнай плошчы жылога памяшкання ў месяц, з прымяненнем паніжаючага каэфіцыенту (у памеры 0,1), устаноўленага рашэннем Магілёўскага аблвыканкама для населеных пунктаў з колькасцю насельніцтва да двух тысяч чалавек. Іншымі словамі, наймальнікі камерцыйнага жылля за карыстанне 1 м.кв. агульнай плошчы жылога памяшкання ў месяц будуць плаціць 3000 рублёў. Да прыкладу, за карыстанне жылым памяшканнем агульнай плошчай жылых памяшканняў 50 м.кв. у месяц трэба заплаціць 150 000 рублёў.

— Наймальнікаў, упэўнена, цікавіць, і куды пойдуць грошы за карыстанне камерцыйным жыллём?

— Сродкі, атрыманыя ад здачы жылых памяшканняў камерцыйнага выкарыстання, у памеры платы за карыстанне, будуць залічвацца на спецыяльныя рахункі (мясцовых выканаўчых і распарадчых органаў або арганізацый, у гаспадарчым распараджэнні якіх знаходзяцца жылыя памяшканні) і будуць накіроўвацца на набыццё, будаўніцтва або рэканструкцыю жылых дамоў, кватэр, капітальных збудаванняў пад жылыя памяшканні камерцыйнага выкарыстання.
Таксама хачу адзначыць, што наймальнікі жылых памяшканняў камерцыйнага выкарыстання будуць высяляцца з усімі, хто ў іх пражывае, без вылучэння іншых жылых памяшканняў у выпадку наяўнасці без уважлівых на тое прычын запазычанасці па ўнясенні платы за карыстанне жылым памяшканнем і (або) жыллёва-камунальныя паслугі ў памеры двухмесячнай платы. Тое самае і ў сувязі спынення працоўных адносін — у выпадку, калі жылое памяшканне прадастаўлена ў сувязі з характарам працоўных адносін. Высяленне магчыма і ў сувязі са скасаваннем тэрміну дзеяння дагавору найму жылога памяшкання, акрамя выпадкаў, калі дадзены дагавор заключаецца на новы тэрмін.

— Як будзе ўстанаўлівацца тэрмін дагавору найму?

— Указам вызначаны парадак ўстанаўлення тэрміну дагавору найму жылога памяшкання камерцыйнага выкарыстання для жылых памяшканняў, якія павінны быць уключаны ў склад жылых памяшканняў камерцыйнага выкарыстання да 1 ліпеня 2016 года — на тэрмін, вызначаны ў раней заключаных дагаворах найму, а калі ў гэтых дагаворах тэрмін не ўказаны або адсутнічаюць дагаворы — безтэрмінова.

— Цікавіць таксама і парадак прыватызацыі жылых памяшканняў дзяржаўнага жыллёвага фонду.

— Ва Указе гэта таксама агаворваецца. Так, наймальнікі ўказаных памяшканняў пры ўмове, што права на прыватызацыю ў іх згодна з заканадаўствам, якое дзейнічае, маецца, павінны да 1 ліпеня 2016 года звярнуцца з заявай аб прыватызацыі займаемых жылых памяшканняў у аддзел ЖКГ Бабруйскага райвыканкама па адрасе: г. Бабруйск вул. Пушкіна 215А, тэл.: 720 468.

Асобна хачу завастрыць увагу на парадку прыватызацыі службовых жылых памяшканняў. Так, грамадзяне, якія пражываюць у жылых памяшканнях, што з’яўляюцца службовымі і ўключаны ў склад жылых памяшканняў камерцыйнага выкарыстання, і якія маюць на 31 сакавіка бягучага года права на набыццё гэтых жылых памяшканняў ва ўласнасць, могуць выкарыстаць гэтае права да 1 ліпеня 2016 года.

— Дзякуй, Ірына Генадзеўна, за размову.

Алена КАРПЕНКА.