Вызначаны пераможцы
Па колькасці прададзенага вяскоўцамі малака дзяржаве (2735 тон) наш раён, як адзначыў старшыня Бабруйскага райсавета дэпутатаў Леанід Баркоўскі, упэўнена трымае лідзіруючую пазіцыю у вобласці, пры тым што даведзенае заданне выканана толькі на 76,5 працэнта. На апошняе паўплывала ўстойлівае зніжэнне колькасці рагуль у прыватных падсобных гаспадарках пры павелічэнні на 100 тон плану закупу ў параўнанні з папярэднім годам.
Так, на адну карову ў 2013-м закуплена 2092 кг пры заданні 2187.
Сярод сельсаветаў з заданнем справіўся Бортнікаўскі, дзе дзяржаве прадалі 742,1 тоны прадукцыі пры заданні 733 (101,2 працэнта), на адну карову тут закуплена 2779 кг. Другі паказчык у Варатынскага сельсавета: пры заданні 330 тон закуплена 304,4 (92 працэнты).
Спаборніцтвы па выніках закупу малака штогод праводзяцца не толькі сярод сельсаветаў, але і сярод маказборшчыкаў і малаказдатчыкаў у розных намінацыях. Днямі ў раёне вызначыліся з пераможцамі. Лепшым малаказборшчыкам прызнана Т.А. Маруга з Гарбацэвічаў, якая закупіла 169,9 тоны малака, (4247 кг на адну карову). На другім месцы — В.В. Дымкова з Малых Бортнікаў з паказчыкам 183,4 тоны (на адну карову — 4074 кг). У намінацыі “Лепшы малаказдатчык, які прадаў дзяржаве найбольшую колькасць малака ад адной каровы” стала А.В. Піліпенка з аграгарадка Варатынь, яна прадала дзяржаве 7931 кг прадукцыі. “Лепшым малаказдатчыкам, які прадаў дзяржаве найбольшую колькасць малака ад двух і болей кароў” прызнана А.М. Лапей з гэтага ж населенага пункта, якая паставіла на перапрацоўку 28,1 тоны прадукцыі. На 2-м месцы ў гэтай катэгорыі А.М. Маруга з вёскі Емяльянаў Мост, якая прадала дзяржаве 18,01 тоны каштоўнай сыравіны.
Дарэчы, сёлета ў Хімоўскім сельсавеце, як адзначыў Леанід Баркоўскі, адбыліся, а ў асобных сельсаветах — плануюцца адбыцца змены ў арганізацыі закупу малака ў насельніцтва. Калі раней місія закупу была ўскладзена на сельвыканкамы ці сельгасарганізацыі, то цяпер гэтыя паслугі бяруць на сябе і прыватнікі, што для насельніцтва, як паказвае вопыт іншых раёнаў, даволі зручна: грашовы разлік адбываецца тройчы на месяц, не ўзнікае пытанняў з тлустасцю малака і колькасцю праплачанай прадукцыі.
Алена КАРПЕНКА.