Вясела і цікава, з песнямі і танцамі ў дашкольнай установе в. Бортнікі мінула ўжо традыцыйнае свята «Каляда».

Дзецям не склала працы здзівіць і развесяліць усіх гледачоў. Чаго толькі каштавала акцёрская гульня галоўных герояў — Казы, Мядзведзя і Цыганкі! У праграме свята гучалі народныя песні «Ой, Калядачка», «Чаму ж мне ня пець?».

Усе прысутныя змаглі ўбачыць танцы «Полька» і «Ручаёк» у выкананні падрастаючых танцораў. Ды і чаму б не паспяваць і не патанцаваць, калі за гэта можна атрымаць яшчэ і пачастункі! Пасля заканчэння мерапрыемства хлопчыкі і дзяўчынкі атрымалі салодкія прысмакі.

Але на гэтым свята не скончылася. Па традыцыі дружнай кампаніяй усе накіраваліся «калядаваць» у іншыя групы, зазірнулі і ў кабінет да загадчыка. І толькі пасля гэтага маленькія акцёры вярнуліся ў групу , дзе на абед іх чакалі традыцыйныя святочныя бліны.

Святлана Бурак,

загадчыца Бортнікаўскага дзіцячага сада.