Фінансавая граматнасць — упэўненасць у будучыні
У шматлікіх краінах 16 сакавіка святкаваўся Міжнародны дзень фінансаў дзяцей і моладзі. Нацыянальны банк Рэспублікі Беларусь прыняў рашэнне далучыцца да гэтай падзеі. У рамках тыдня дзіцячай фінграматнасці запланавана вялікая колькасць адкрытых урокаў, гадзін інфармавання, выступленняў банкаўскіх спецыялістаў перад навучэнцамі ўстаноў адукацыі, а таксама заняткаў з дзецьмі дашкольнага і малодшага школьнага ўзросту.
20 сакавіка для школьнікаў 6-11 класаў Ленінскага ВПК «Дзіцячы сад-СШ» прайшла інфармацыйная гадзіна “Асновы фінансавай граматнасці”. Прадстаўнікі ААТ “Белаграпрамбанк” Арына Коршак і Яўгенія Календа з дапамогай мультымедыйнай прэзентацыі даступна, наглядна і цікава данеслі да дзяцей складаныя фінансавыя паняцці, а таксама падарылі на памяць рэкламныя буклеты і сцяжкі банка. Асабліва вучняў зацікавіла дзіцячая ашчадная праграма “Расці вялікі!”. Школьнікі задавалі пытанні, цікавіліся ажыццяўленнем банкаўскіх аперацый, набыццём пластыкавых картак.
Дзякуючы такім мерапрыемствам школьнікі набываюць уменні распараджацца грашовымі рэсурсамі, планаваць будучыню і быць гатовымі да непажаданых сітуацый. Працаўнікі банка ў сваю чаргу спадзяюцца, што дзякуючы такім праектам вучні змогуць павялічыць не толькі сваю фінансавую пісьменнасць, але і перададуць новыя веды сваім бацькам.
Вынікам дадзенай працы па павышэнні фінансавай адукацыі маладога пакалення стане яго ўпэўненасць у будучыні, стабільнасць і росквіт эканомікі і грамадства ў цэлым.
Таццяна Бусел,
вучаніца 10 класа Ленінскага ВПК, юнкор.