Рамонт не стаіць на месцы

Тэрмін, адведзены на зімовы рамонт сельскагаспадарчай тэхнікі, дзень ад дня скарачаецца. Да традыцыйнай пастаноўкі пасяўных машын і агрэгатаў на лінейку гатоўнасці засталося меней месяца. Ці паспеюць у сельгасарганізацыях да гэтага часу завяршыць рамонтныя работы. Ці ва ўсіх з іх аднолькава адказны падыход да гэтай важнай задачы? — адказам на гэтыя пытанні мы пацікавіліся ў начальніка вытворчага аддзела упраўлення сельскай гаспадаркі і харчавання райвыканкама Віталія Епіхава.

— У рамонце мы кіруемся тым, што гатоўнасць пасяўной тэхнікі на 1 сакавіка павінна адпавядаць 95 працэнтам. Маюцца на ўвазе ўсе трактары і ўся глебаапрацоўчая пасяўная тэхніка, а таксама машыны па ўнясенні ў глебу ўгнаенняў і пратручванні насення. На сёння з 323-х трактараў, якія ў раёне маюцца, спраўныя 300. Іх гатоўнасць — 93 працэнты. Такім чынам за тыдзень, што застаўся да 1-га сакавіка, нам неабходна адрамантаваць яшчэ 2 працэнты трактароў. У асноўным пытанні маюцца па энерганасычаных Беларусах -3022. З 24-х адзінак, якія маюцца, на гэты час спраўны 21 трактар. Тры пакуль застаюцца ў рамонце: адзін — у Кіраўскай сельгастэхніцы, рухавік з другога знаходзіцца на магілёўскім рамонтным заводзе,  яшчэ адзін трактар рамантуецца непасрэдна ў гаспадарцы. 

Пастаўленую задачу — адрамантаваць усю тэхніку, якая маецца, да 1 сакавіка — у гаспадарках разумеюць, і прадпрымаюць ўсе неабходныя меры, каб яе вырашыць: у час і якасна падрыхтавацца да правядзення веснавой пасяўной 2013 года. Рамонтныя работы вядуць усе гаспадаркі, аднак аб’ём у кожнай розны. На гэты час найлепшая гатоўнасць у СВК “Гігант”, СВК “Калгас імя А. Неўскага”, у філіяле “Варатынь” РУП “БЗТДіА”. 95 працэнтаў гатоўнасці тэхнікі ў  філіяле “Харчавік-Агра” ААТ “Чырвоны харчавік”. Добрымі тэмпамі вядуцца рамонтныя работы ў ААТ “Саўгас “Кісялевічы”. Астатнія гаспадаркі да іх узроўню падцягваюцца, і думаю, што на лінейку гатоўнасці будзе выстаўлена ўся тэхніка, неабходная для веснавых палявых работ.

 Запісала Алена КАРПЕНКА.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.