Вядзецца рамонт тэхнікі

Каб веснавая пасяўная кампанія прайшла зладжана, у тэхналагічна  вызначаныя тэрміны, ужо цяпер вядзецца да яе падрыхтоўка: у гаспадарках займаюцца ачысткай ад прымясяў і пустазелля насення, нарыхтоўваюць і вывозяць на палі арганіку, рамантуюць неабходную тэхніку. Да пошняга — для таго каб забяспечыць ва ўстаноўленыя тэрміны гатоўнасць машынна-трактарнага парку, па словах начальніка вытворчага аддзела ўпраўлення сельскай гаспадаркі і харчавання райвыканкама Віталія Епіхава, прыступілі ўжо з пачатку кастрычніка.

У прыватнасці з 1 кастрычніка распрацавалі графікі рамонту тэхнікі, якія прадугледжваюць яго завяршэнне да веснавых палявых работ 2013 года. Яшчэ да кастрычніка падрыхтавалі рамонтна-абслуговую базу да работы ў зімовых умовах: майстэрні аснасцілі цеплагенератарамі на мясцовых відах паліва і ўцеплілі. Да 10 лістапада была завершана пастаноўка тэхнікі на працяглае захаванне, з 1 лістапада пачаўся непасрэдны рамонтны сязон.  Для гэтага была праведзена дэфектоўка ўсёй тэхнікі, якая маецца ў раёне, пачынаючы са складаных зернеўборачных камбайнаў, энерганасычаных трактараў да кормаўборачнай тэхнікі, сельскагаспадарчых машын і прычэпаў. Згодна даведзенаму заданню аблсельгасхарча ў кожнай гаспадарцы распрацаваны графікі рамонту, створаны звенні па рамонце, распрацавана акордна-прэміяльная аплата працы, створаны камісіі па прыёмцы адрамантаванай тэхнікі. У раёне створана камісія па кантролі за ходам рамонту пад началам першага намесніка старшыні райвыканкама Валерыя Сяргейчыка. У яе склад ўвайшлі таксама начальнік дзяржтэхнагляду Іван Гайшун, начальнік вытворчага аддзела райсельгасхарчу Віталій Епіхаў, галоўны спецыяліст па ахове працы ўпраўлення Мікалай Голуб і дырэктар Бабруйскага ААТ “Аграмашсервіс” Сяргей Свірко.

Дарэчы, да пачатку веснавых палявых работ у раёне, як і штогод, плануюць абнавіць машынна-трактарны  парк. Без набыцця новай тэхнікі, як заўважае Віталій Епіхаў, немагчыма рухацца наперад, яна павялічвае вытворчасць працы. Ужо да новага года плануецца набыць за ўласныя сродкі сельгасарганізацый 18 адзінак трактароў Беларус-1221 і Беларус-82. Першымі папоўніцца трактарны парк СВК “Гігант”, “Калгас імя А. Неўскага” і філіялу “Варатынь” РУП “БЗТДіА”. Трактары Беларус-82 разлічваюць набыць гэтыя ж гаспадаркі, а яшчэ — ААТ “Саўгас “Кісялевічы” і ААТ “Аграмашсервіс”.

Алена КАРПЕНКА. 

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.