Час падрыхтоўкі да веснавой сяўбы
Палявыя работы завершаны. Між тым спраў, нягледзячы на зіму, у работнікаў сельскай гаспадаркі дастаткова. Час не стаіць на месцы: за зімой надыдзе вясна, а з ёй і напружаная пара веснавых палявых работ і сяўбы. Ужо цяпер, як паведамілі ва ўпраўленні сельскай гаспадаркі і харчавання райвыканкама, вядзецца актыўная да яе падрыхтоўка.
Літаральна ва ўсіх сельгасарганізацыях займаюцца нарыхтоўкай і вывазкай на палі арганічных угнаенняў. З плану ў 297 тысяч тон на палі вывезена больш за 100 тысяч. Гэтая работа будзе працягвацца да самой вясны. Пакуль надвор’е дазваляла, арганіка ўносілася ў глебу. Што да мінеральных угнаенняў, то пад зябліўную апрацоўку, якая праводзілася восенню, унесены фосфарныя і калійныя (прыкладна 60 працэнтаў ад неабходнай колькасці). Астатнюю іх колькасць плануецца набыць за зіму і ўнесці ўжо ўвесну.
Да таго ж гэтым часам вядзецца апрацоўка насеннага матэрыялу. Усяго ў раёне неабходна засыпаць 2500 тон насення зерневых і зернебабовых культур. У наяўнасці яно маецца, аднак вядзецца дапрацоўка да кандыцыйных патрабаванняў. Найперш гэта ачыстка ад культурнай прымясі і пустазелля. Вядзецца таксама ачыстка насення мнагалетніх траў, якіх раёну неабходна нарыхтаваць 133 тоны (з іх бабовых — 30 тон, і яны маюцца).
Дарэчы, у наступным годзе плануецца некалькі павялічыць пасяўныя плошчы аўсу і зернебабовых культур. Гэта звязана ў першую чаргу з нятаннай цаной на азотныя ўгнаенні і неабходнасцю павышэння азоту ў глебе. Менавіта зернебабовыя культуры, у якіх маюцца азотфіксуючыя бактэрыі, абагачваюць глебу азотам. Таму стаіць задача — павялічваць іх працэнт у агульнай структуры пасяўных плошчаў.
Акрамя работ, звязаных непасрэдна з падрыхтоўкай да веснавой сяўбы, у шэрагу гаспадарак: СВК “Калгас імя Дзяржынскага”, ААТ “Саўгас Кісялевічы”, ААТ “Агракамбінат “Бабруйскі” — гэтым часам займаюцца раскарчоўкай старых садоў, якія, займаючы пашню, практычна не пладаносяць. Вызваленая зямля будзе ўведзена ў севаабарот.
Алена КАРПЕНКА.