Вырашаліся надзённыя пытанні

На рабочай нарадзе ў панядзелак, якую правёў старшыня раённага выканаўчага камітэта Міхаіл Шалкоўскі, па традыцыі вялося абмеркаванне надзённых пытанняў.

У сельскай гаспадарцы — гэта восеньскія палявыя работы. Як адзначыў першы намеснік старшыні, начальнік райсельгасхарчу Валерый Сяргейчык, яны ў раёне ў стадыі завяршэння. У прыватнасці кукурузы на зялёны корм і сілас убрана 66 працэнтаў ад неабходнага. Там, дзе сеялі цукровыя буракі: СВК “Калгас імя А. Неўскага”, “Калгас імя Дзяржынскага” і філіял “Харчавік-Агра” ААТ “Чырвоны харчавік”, — ва ўсю вядзецца іх уборка. Сярэдняя ўраджайнасць клубняў на раніцу панядзелка склала 347 ц/га. Бульба выкапана на плошчы 946 га пры плане 1030 га, яе сабрана без малога 35 тысяч тон  пры сярэдняй ураджайнасці 369,5 ц/га.  Чатыры з паловай тысячы тон бульбы здадзена ў лік дзяржзаказу, значная частка будзе пакладзена на захаванне ў бульбасховішчы і прыстасаваныя для гэтых мэт збудаванні. Кіраўнік раёна пры гэтым нагадаў даручэнне Прэзідэнта краіны — не дапусціць захавання бульбы ў буртах.

Што датычыцца жывёлагадоўлі, то, як было адзначана, у раёне апошнім часам павялічылі пагалоўе, што дае магчымасць, пры дастатковай назапашанасці корму, спадзявацца на нарошчванне аб’ёмаў мяса і малака. У параўнанні да мінулага года “мінусуюць” дзве гаспадаркі: СВК “Гігант” і філіял “Харчавік-агра” ААТ “Чырвоны харчавік”.

Намеснік старшыні райвыканкама Тамара Рудая звярнула ўвагу кіраўнікоў, у першую чаргу сельскагаспадарчай галіны, на неабходнасць больш адказна падыйсці да прыцягнення ў гаспадарчы абарот аб’ектаў, якія не выкарыстоўваюцца. Калі для далейшай эксплуатацыі такія аб’екты непрыгодны, іх неабходна тэрмінова ліквідаваць.

Спыніўшыся на аналізе работы сельскагаспадарчых кірмашоў, намеснік старшыні завастрыла ўвагу на нізкай актыўнасці ў гэтым плане некаторых гаспадарак і заклікала дадзеную работу наладзіць. Кіраўнік раёна пры гэтым указаў на неабходнасць вывучыць попыт на сельгаспрадукцыю жыхароў населеных пунктаў Глуша і Туголіца.

Аб тым, якая работа праведзена і праводзіцца ў раёне да Дня пажылых людзей і Дня маці, далажыла на нарадзе намеснік старшыні райвыканкама Святлана Носава. У прыватнасці яна адзначыла, што падчас акцыі, учыненай Бабруйскай раённай арганізацыяй Беларускага Таварыства Чырвонага Крыжа,  медыцынскае абследаванне, кансультацыі і рэкамендацыі спецыялістаў толькі з 1 па 4 кастрычніка атрымаў  571 жыхар раёна. З 1 па 31 кастрычніка ў раёне аб’яўлена акцыя “Жыві бяспечна”, у межах якой праводзіцца абследаванне домаўладанняў, дзе пражываюць дзеці, у тым ліку шматдзетных сем’яў і сем’яў, якія знаходзяцца ў сацыяльна-небяспечным становішчы. Кіраўнікам суб’ектаў гаспадарання Святлана Сяргееўна ўказала на неабходнасць актывізаваць работу па стварэнні ў іх арганізацыях безбар’ернага асяродку для людзей з абмежаванымі магчымасцямі. Акрамя таго, нагадала аб правядзенні 20-га кастрычніка раённых спаборніцтваў па настольным тэнісе сярод прадпрыемстваў і сельгасарганізацый і неабходнасці ўжо цяпер падаваць заяўкі на ўдзел у іх.  

Намеснік старшыні райвыканкама Ігар Кісель распавёў аб тым, дзе ў раёне плануецца весці будаўніцтва жылля, а таксама завастрыў увагу на сітуацыі, якая склалася вакол будаўніцтва бульбасховішча ў СВК “Калгас імя А. Неўскага”. Што да апошняга, то кіраўнік раёна даў указанне работы на гэтым аб’екце паскорыць: сёлета ў гаспадарцы багаты ўраджай клубняў, увядзенне ў строй бульбасховішча дасць магчымасць якасна яго захаваць.

Не абыйшлі на планёрцы і такое важнае пытанне як стан правапарадку на тэрыторыі раёна. Начальнік РАУС Сяргей Малішэўскі далажыў аб злачынствах, якія былі ўчынены на мінулым тыдні, і мерах, накіраваных на папярэджванне апошніх.

Алена КАРПЕНКА.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.