Будзе згуртаваная каманда — будзе і вынік

Пытанні малочнай вытворчасці на кантролі ў раёне на працягу года. І небезпадстаўна: грошы ад продажу дзяржаве рэнтабельнай прадукцыі гаспадаркі маюць штодня. Залішнім будзе гаварыць, наколькі ў апошніх маецца патрэба. 

Між тым, падыход да арганізацыі вытворчага працэсу, а значыць, і вынікі работы ў малочнай галіне, як заўважае ў нашай з ім размове першы намеснік старшыні райвыканкама, начальнік упраўлення сельскай гаспадаркі і харчавання Валерый Сяргейчык, у гаспадарках розныя. Чаму? На гэты конт у кіраўніка райсельгасхарчу меркаванне цвёрдае. Аднак па парадку:

— Валерый Аляксандравіч, як абстаяць справы ў малочнай вытворчасці гэтым часам, у прыватнасці, за перыяд з пачатку кастрычніка?

— З пачатку месяца валавая вытворчасць малака ў раёне склала 2554 тоны, або 101 працэнт да аналагічнага перыяду мінулага года.

Надой на адну карову склаў 10,1 кг малака, што на 0,2 кг болей, чым летась. Узрасла рэалізацыя малака дзяржаве. За перыяд з пачатку месяца гаспадаркі прадалі 2094,4 тоны прадукцыі, або 106 працэнтаў да мінулага года. Нядрэнны сярэднераённы паказчык тлустасці малака — 3,7 працэнта. Але гэта, паўтаруся, лічбы, якія характарызуюць стан развіцця малочнай вытворчасці ў цэлым па раёне. Некалькі іншая сітуацыя, калі аналізаваць у разрэзе гаспадарак. Той жа СВК “Гігант” у параўнанні да аналагічнага перыяду мінулага года знізіў валавую вытворчасць, яна склала ўсяго толькі 78 працэнтаў. Не дабралі леташняга малака і ў філіяле “Харчавік-Агра” ААТ “Чырвоны харчавік” — 88 працэнтаў. Са станоўчага боку хочацца адзначыць ААТ “Саўгас “Кісялевічы”, дзе аб’ёмы павялічылі да 122 працэнтаў, ААТ “Агракамбінат “Бабруйскі” — 115 працэнтаў і філіял “Варатынь” РУП “БЗТДіА” — 114.  Калі браць рэалізацыю малака, то знізілі аб’ёмы продажу зноў жа  ў СВК  “Гігант”  і філіяле “Харчавік-Агра” — 61 і 97 працэнтаў суадносна. Павялічылі — у Бабруйскім ААТ “Аграмашсервіс” — 132 працэнты, ААТ “Саўгас “Кісялевічы” і ААТ “Агракамбінат Бабруйскі” — па 126 працэнтаў, а таксама ў філіяле “Варатынь” — 120 працэнтаў у параўнанні да мінулага года. У астатніх гаспадарках таксама адзначаны рост валавой вытворчасці: ад 101 працэнта ў СВК “Калгас імя Дзяржынскага” да 108 працэнтаў у СВК “Калгас імя А. Неўскага”.

— На працягу апошняга часу СВК “Гігант” — гаспадарка, з якой прывыклі звязваць толькі станоўчыя дасягненні, значна знізіла аб’ёмы вытворчасці і, як вынік, аб’ёмы рэалізацыі малака. З чым гэта звязана і наколькі вырашальныя там праблемы?

— Прычына сітуацыі, якая склалася ў “Гіганце” — у лячэнні хворых жывёл. А ўлічваючы тое, што гаспадарка — другая ў раёне пасля СВК “Калгас імя А. Неўскага” па аб’ёмах  вытворчасці прадукцыі, вядома, што яе ўплыў на агульны стан развіцця малочнай вытворчасці ў раёне дастаткова прыкметны. Спадзяемся, што сітуацыя там выправіцца.  

— Гаворачы пра жывёлагадоўлю, нельга не закрануць пытанне корму. Незнарок народная мудрасць гаворыць: “Малако ў каровы на языку”. Ці дастаткова ў раёне корму, каб у далейшым можна было разлічваць на малако ды і мяса таксама?

— Корму на зімоўку назапашана дастаткова. Між тым, сам па сабе гэты факт яшчэ нічога не значыць, або значыць не настолькі, каб з упэўненасцю сцвярджаць, што вытворчасць жывёлаводчай прадукцыі ва ўсіх гаспадарках будзе павялічвацца. Можна мець корм, але не даць яго жывёле, або даць несвоечасова, або без уліку збалансаванасці рацыёнаў… Там не даглядзелі, тут парушылі тэхналогію — і таго, на што разлічвалі, не атрымалі. Іншымі словамі, трэба каб у кожнай сельгасарганізацыі была згуртаваная каманда людзей, зацікаўленых у выніках сваёй работы — ад кіраўніка да спецыялістаў, аператараў машыннага даення. Там, дзе такая каманда ёсць, і справы ідуць на лад. А дзе яе няма, дзе кожны сам па сабе, пры сваіх інтарэсах, наўрад ці можна гаварыць пра значны прарыў. Узяць хоць бы СВК “Калгас імя Дзяржынскага”. Учора там правялі рабочую нараду. Здавалася б, усё маецца: зерне, травяны корм, жывёла, ёсць расцёлы, а станоўчых зрухаў няма. Чаму, да прыкладу, нізкі працэнт малака гатунку “экстра”? Таму што няма згуртаванай каманды прафесіяналаў, няма патрэбнага кантролю за вытворчым працэсам. Пытанне на нарадзе ставілася жорстка, будзем спадзявацца на станоўчыя змены. Гэта, дарэчы, тычыцца і некаторых іншых гаспадарак, дзе павінны зразумець, што ад працоўнай дысцыпліны выгоду атрымаюць  у першую чаргу яны самі.

— Дзякуй, Валерый Аляксандравіч, за размову.

 Алена КАРПЕНКА.  

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.