У дзень памяці гучаў «Звон смутку»

Дата 22 чэрвеня назаўжды ўрэзалася ў памяць беларусаў. У гэты дзень 71 год таму абарвалася мірнае жыццё мільёнаў людзей. Увесь беларускі народ падняўся на абарону сваёй Радзімы і з гонарам, хоць і цаной вялікіх страт, вынес выпрабаванні ваеннага ліхалецця.

Цяпер 22 чэрвеня — Дзень усенароднай памяці ахвяр Вялікай Айчыннай вайны. Жыхары Беларусі, у тым ліку моладзь, удзячны дзядам і прадзедам за мір, за вольнае жыццё. Дзякуючы іх мужнасці і гераізму цяперашняе пакаленне  жыве пад мірным небам, займаецца стваральнай працай.

У Дзень памяці на тэрыторыі Магілёўскай вобласці прайшла маладзёжная патрыятычная акцыя “Звон смутку”, якую арганізавалі Магілёўскі абласны камітэт ГА “БРСМ”, Магілёўская і Бабруйская епархіі Беларускай праваслаўнай царквы пры падтрымцы аблвыканкама, раённых і гарадскіх выканаўчых камітэтаў, Магілёўскага абласнога аддзялення беларускага фонду міру. Мэта акцыі — грамадзянска-патрыятычнае і духоўнае выхаванне моладзі, выхаванне павагі да гераічнага і гістарычнага мінулага, традыцый беларускага народа, захаванне пераемнасці пакаленняў, а таксама развіццё супрацоўніцтва абласной арганізацыі ГА “БРСМ” і Беларускай праваслаўнай царквы па фарміраванні сістэмы патрыятычнага і духоўна-маральнага выхавання дзяцей і моладзі.  Лейтматыў акцыі — спыніся, памаўчы, паслухай звон смутку, ушануй памяць людзей, якія загінулі, у імя будучых пакаленняў.

Да акцыі далучыўся і наш раён. У 12 гадзін члены пярвічных арганізацый ГА “БРСМ” ушанавалі памяць ахвяр Вялікай Айчыннай вайны хвілінай маўчання. Ва ўстановах адукацыі, летніх аздараўленчых лагерах прайшлі размовы аб трагічных старонках у гісторыі Радзімы, аб неўміручым подзвігу беларускага народа, які сваёй мужнасцю і верай у перамогу не дазволіў ворагу сябе зняволіць. У Бабруйскім аграрна-эканамічным каледжы па мясцовым вяшчанні на працягу дня вялася трансляцыя тэматычнага аўдыёроліка. З хвіліны маўчання пачалася ў гэты дзень і праграма раённага турысцкага злёту моладзі.

Максім КАРПЕНКА.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.