У райвыканкаме

Паскорыць уборачныя работы, павялічыць вытворчасць малака, трымаць на кантролі выплату заработнай платы, удасканаліць і актывізаваць работу з насельніцтвам па навядзенні парадку на прысядзібных надзелах — гэтыя і іншыя пытанні абмяркоўваліся на рабочай нарадзе, якую ў панядзелак правёў старшыня райвыканкама Міхаіл Шалкоўскі. 

Завастраючы ўвагу на справах у раслінаводчай галіне,  першы намеснік старшыні райвыканкама, начальнік райсельгасхарчу Валерый Сяргейчык адзначыў, што ў раёне гэтым часам працягваецца ўборка кукурузы на зерне і сілас, заканчваецца капанне бульбы. Цукровыя буракі ўбраны больш чым на палове плошчаў. З гародніны засталося ўбраць познюю капусту і сталовыя буракі. Ну і, вядома ж, працягваецца падняцце зябліва пад сяўбу ярыны. Закрануўшы справы ў жывёлагадоўлі, у прыватнасці, малочнай вытворчасці, Валерый Сяргейчык адзначыў,што ў сельгасарганізацыях маецца ўсё неабходнае для таго, каб нарошчваць аб’ёмы малака. І той факт, што ў шэрагу гаспадарак гэтага не назіраецца, гаворыць пра недапрацоўку арганізацыйных момантаў. Менавіта па дадзеных пытаннях, а таксама задачах на бліжэйшы час  на гэтым тыдні пройдзе нарада з удзелам адказных за жывёлагадоўлю работнікаў райсельгасхарчу, кіраўнікоў і галоўных спецыялістаў сельгаспрадпрыемстваў.

Намеснік старшыні райвыканкама Тамара Рудая нагадала прысутным ад даручэнні губернатара вобласці Пятра Рудніка — выплаціць заработную плату за верасень не пазней 25-га кастрычніка. Таксама яна паведаміла аб правядзенні ў раёне аўкцыёнаў па продажы аб’ектаў нерухомасці, якія не выкарыстоўваюцца. Па словах намесніка старшыні, не зніжаецца пакупнікоўская актыўнасць кірмашоў. Падчас апошняга, “Пакроўскага кірмашу”, выручка сельгасарганізацый і райспажыўтаварыства склала больш за 105 млн. рублёў. 

У справаздачы па пытаннях сацыяльнай сферы намеснік старшыні райвыканкама Святлана Носава адзначыла, што ўрачыстасці да Дня маці прайшлі ва ўсіх клубных установах і ўстановах адукацыі. Як станоўчае, быў адзначаны і той факт, што калектыў нашага раёна, фальклорны народны ансамбль песні “Пярэзвы”, 16 кастрычніка прыняў удзел у рэспубліканскім кірмашы ў Мінску, які ладзілі прадпрыемствы Магілёўскай вобласці. Кіраўнікам арганізацый Святлана Носава нагадала аб неабходнасці зрабіць адлічэнні ў Фонд міру, удзельнікам інфармацыйных груп — аб правядзенні на гэтым тыдні дня інфармавання насельніцтва.   

Аб рабоце, якая праводзіцца ў раёне па добраўпарадкаванні тэрыторый, далажыў на планёрцы старшыня раённага Савета дэпутатаў Леанід Баркоўскі. У прыватнасці, ім было адзначана, што на мінулым тыдні значная ўвага ўдзялялася зачыстцы звалак, абкосцы населеных пунктаў і дарог, спілаванню аварыйных дрэваў, рамонту ў Вялікіх Бортніках агароджы. Пры гэтым старшыня райсавета выказаў нараканні ў адрас асобных арганізацый, дзе на выдадзеныя экалагічнай службай прадпісанні рэагаваць не спяшаюцца. А вось кіраўнік раёна парэкамендаваў большую настойлівасць і актыўнасць праяўляць санітарнай службе ў пытаннях, звязаных з навядзеннем парадку на прысядзібных надзелах і калядваровых тэрыторыях жыхароў.

Алена КАРПЕНКА.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.