“Ад усёй душы” да пажылых
2 кастрычніка ў сельскім клубе в. Сычкава прайшло мерапрыемства, прысвечанае Міжнароднаму дню пажылых людзей.
Як паведаміла загадчыца клуба Алена Радзіміновіч, мерапрыемства ладзілася ў форме святочнага агеньчыка і насіла назву “Ад усёй душы”. Акрамя захапляльнай канцэртнай праграмы, якую падрыхтавала вакальная група ўстановы “Вечарынка”, агеньчык уключаў у сябе і гульнёвую праграму з конкурсамі: на лепшага выканаўцу частушкі, паэтычнага твора, на лепшага дызайнера кулінарных вырабаў. Пераможцам конкурсаў былі ўручаны прызы, набытыя на сродкі раённага савета ветэранаў.
За салодкім сталом пажылыя людзі, па словах Алены Іванаўны, сапраўды адпачылі душой: праглядзелі цудоўную канцэртную праграму, прадэманстравалі свае творчыя здольнасці, набраліся станоўчых уражанняў.
Дарэчы, на тэрыторыі Сычкаўскага сельсавета працягваецца акцыя “Вы не адзінокія”, падчас якой клубныя работнікі і самадзейныя артысты наведваюць пажылых людзей, чый стан здароўя не дазваляе самім прыйсці ў клуб, і наладжваюць для іх міні-канцэрты.
Алена КАРПЕНКА.