Хутчэй ураджай убірай — і пра дзяржзаказ не забывай
Камбайнеры СВК “Калгас імя Дзяржынскага” першымі ў раёне намалацілі болей 1 тысячы тон зерня новага ўраджаю. Такі лік агульнаму намалоту яны адкрылі яшчэ напрыканцы мінулага тыдня.
— А сёння на раніцу, — паведаміла ўчора па тэлефоне галоўны аграном гаспадаркі Галіна Вяроўкіна, — агульны намалот у нас ужо склаў 1656 тон зерня. Збожжавыя ўжо ўбраны з плошчы амаль 430 гектараў. Але работы яшчэ шмат. Таму што азімай і яравой збажыной у нас сёлета занята 2 тысячы гектараў.
Па словах галоўнага агранома, уперадзе сярод механізатараў па намалоту ідзе экіпаж камбайна КЗС-1218, у складзе якога працуюць Міхаіл Іванавіч Ганчароў і Іван Уладзіміравіч Цікавы. Добрым намалотам камбайнераў спрыяе і неблагая па сёлетнім годзе ўраджайнасць хлебнай нівы. У сярэднім з гектара “дзяржынцы” збіраюць больш за 40 цэнтнераў зерня.
Працаўнікі гэтай гаспадаркі імкнуцца не толькі хутчэй убраць вырашчаны ўраджай — не забываюць яны таксама і аб выкананні сваёй першай хлебаробскай запаведзі. Па стану на раніцу ўчарашняга дня, яны ўжо адправілі на Бабруйскі камбінат хлебапрадуктаў у залік дзяржзаказа каля 300 тон зерня пшаніцы. Пастаўкі хлеба з палёў гаспадаркі на камбінат працягваюцца.
Міхаіл ВЕРАСОЎСКІ.