Шанц праявіць сябе

У сапраўднае свята ператварыўся для людзей з абмежаванымі магчымасцямі агляд-конкурс “Алё, мы шукаем таленты!” на лепшага песеннага выканаўцу сярод жыхароў раёна.

Арганізатарамі мерапрыемства стала Бабруйская раённая грамадская арганізацыя “Беларускае таварыства інвалідаў” пад кіраўніцтвам яе старшыні Мікалая Самонава. У склад журы ўвайшлі прадстаўнікі аддзела культуры райвыканкама, РК ГА “БРСМ”, Цэнтра сацыяльнага абслугоўвання насельніцтва раёна, ГА “Чырвоны крыж”, а таксама старшыня Магілёўскай абласной арганізацыі “Беларускае таварыства інвалідаў” Сяргей Кузьмін, які даў высокую ацэнку рабоце арганізацыі раёна і падкрэсліў, што ў вобласці за апошнія гады намеціліся, у тым ліку і намаганнямі абласной арганізацыі інвалідаў, станоўчыя зрухі па адаптацыі людзей з абмежаванымі магчымасцямі ў грамадстве.

Конкурс ладзіўся з мэтай вылучыць лепшага вакаліста з ліку інвалідаў для далейшага яго ўдзелу ў абласным этапе, а калі пашчасціць, то і рэспубліканскім, які пройдзе ў межах “Славянскага базару” у Віцебску. Аднак, як прызнаўся ў нашай размове Мікалай Самонаў, — для сябе галоўную мэту ён ставіў нават у іншым: аб’яднаць людзей з абмежаванымі магчымасцямі, даць усім жадаючым шанц праявіць сябе, прадэманстраваць свае здольнасці і проста іх “расштурхаць”.

Хачу сказаць, што гэтая задумка сапраўды ўдалася. Зала была поўная людзей, і канцэрт прайшоў на адным дыханні.

Я незнарок называю канцэрт, бо пра конкурс, як мне здаецца, яго ўдзельнікі забыліся адразу ж пасля таго, як апошні быў аб’яўлены. Зразумела, усе, хто выходзіў на сцэну, хваляваліся, і, без сумнення, болей, чым хвалююцца людзі, магчымасці якіх не абмежаваны, аднак атмасфера мерапрыемства была настолькі шчырай, падтрымка зала настолькі цёплай, што, упэўнена, пазайздройсцілі б нават зоркі эстрады.

Як на любым конкурсе, песні былі рознай тэматыкі і рознага жанру. Не абыйшлося без любімага народнага — частушак, у якім ўдзельнікі, у тым ліку і Раіса Бурак з Вялікіх Бортнікаў — дэманстравалі сапраўднае майстэрства. Кожны з іх па-свойму заслугоўваў увагі, асабліва ўлічваючы тое, што іншым нялегка было нават на сцэну падняцца. Але ўпэўнена: у той момант, калі ім дарылі дружныя апладысменты, падтрымлівалі словамі “малайчына”, “брава”, людзі забываліся на свае праблемы, поўніліся радасцю, і ўжо гэта рабіла конкурс святам.

Сапраўдны шквал авацый выклікала выступленне Вадзіма Галіноўскага з Каменскага псіханеўралагічнага дома-інтэрната (на здымку). Выдатныя вакальныя дадзеныя хлопца не пакінулі раўнадушнымі нікога. Дарэчы, менавіта Вадзім стаў пераможцам раённага конкурсу і прыме ўдзел у абласным яго этапе. Другое месца журы прысудзіла Аляксандру Зайчанка з вёскі Бярэзавічы, трэцяе — Алегу Печанкову, таксама з Каменскага псіханеўралагічнага дома-інтэрната. Ну а прыз сімпатый гледачоў — і з гэтым пагадзіўся ўвесь зал, дастаўся самаму юнаму ўдзельніку: дзевяцігадоваму Максіму Пракоф’еву з вёскі Кавалі, які і спяваў, і чытаў верш пра самае галоўнае, у чым маюць патрэбу людзі, і асабліва з абмежаванымі магчымасцямі, — сапраўдных, верных сяброў. 

Як і было агаворана ўмовамі агляду-конкурсу, яго пераможцы, на сродкі ад узносаў членаў раённай арганізацыі інвалідаў, атрымалі грашовыя прэміі ад 50 да 100 тысяч рублёў, якія пад гучныя апладысменты зала ўручыў Мікалай Самонаў.

Конкурс завяршыўся, падараваўшы і ўдзельнікам, і гасцям мерапрыемства выдатны настрой. А ў Мікалая Іванавіча ўжо новыя задумкі наконт таго, як напоўніць жыццё членаў арганізацыі, людзей, чые магчымасці па той ці іншай прычыне сталі абмежаванымі, прыемнымі ўражаннямі, а заадно і верай, што яны такія ж, як і ўсе людзі на зямлі.

 P.S. Бабруйская раённая грамадская арганізацыя “Беларускае таварыства інвалідаў” і асабіста Мікалай Самонаў выказваюць словы прабачэння ўдзельнікам конкурсу за немагчымасць забяспечыць іх транспартам — сродкі арганізацыі абмежаваныя.

 Алена КАРПЕНКА.

Фота Дзмітрыя БЕГУНОВІЧА.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.