Працоўную дысцыпліну — на строгі кантроль

Планёрку ў гэты панядзелак старшыня раённага выканаўчага камітэта Міхаіл Шалкоўскі пачаў з пытанняў дысцыпліны на працоўных месцах, строгага выканання патрабаванняў Дырэктыў Прэзідэнта Рэспублікі Беларусь. Па словах кіраўніка раёна, працоўная дысцыпліна — адна са складаючых павелічэння вытворчасці працы, у той час як апошняе — галоўная ўмова для нарошчвання аб’ёмаў вытворчасці і выканання даведзеных раёну прагнозных паказчыкаў, што, у сваю чаргу, з’яўляецца прамым абавязкам кожнага работніка раёна. 

Чысціню ў кожны двор

Другім пытаннем, на якім на пачатку планёркі завастрыў увагу старшыня райвыканкама, было абмеркаванне кантролю за навядзеннем парадку і чысціні ў населеных пунктах. Аб праведзенай у гэтым накірунку рабоце з боку санітарнай, экалагічнай службаў, а таксама рабочай групы па добраўпарадванні райвыканкама далажылі галоўны санітарны ўрач Бабруйскага раёна і г. Бабруйска Валянціна Парахневіч, намеснік начальніка гаррайінспекцыі прыродных рэсурсаў і аховы навакольнага асяроддзя Ігар Гайдучык, начальнік аддзела архітэктуры і будаўніцтва Віктар Кондрат. Пры гэтым было заўважана, што работа, праведзеная рабочай групай па добраўпарадкаванні на мінулым тыдні па кантролі за выкананнем раней выдадзеных грамадзянам і юрыдычным асобам прадпісанняў, недастатковая і патрабуе актывізацыі. Пастаўлена задача — у бліжэйшы час праверыць выкананне ўсіх без выключэння прадпісанняў. Сельсаветам і дарожнікам — своечасова займацца абкоскай тэрыторый. 

У гаспадарках сеюць грэчку

Як паведаміў першы намеснік старшыні райвыканкама, начальнік райсельгасхарчу Валерый Сяргейчык, дзве з чатырох сельгасарганізацый раёна на пачатак тыдня прыступілі да сяўбы грэчкі. Сяўба ярыны заканчваецца, кукурузу засталося дасеяць у СВК “Калгас імя Дзяржынскага”, СВК “Калгас імя А. Неўскага”, ААТ “Саўгас “Кісялевічы” і ААТ “Агракамбінат “Бабруйскі”.  На гэтым тыдні плануецца завяршыць пасадку гародніны, якой на пачатак тыдня ўжо было пасаджана 80 працэнтаў ад задання. Азімыя зерневыя культуры і азімы рапс у раёне падкормлены. Гэтым часам падсейваюцца мнагалетнія травы, у шэрагу гаспадарак працягваюць вывозіць арганіку.  

Што да жывёлагадоўлі, то, як адзначыў Валерый Сяргейчык, на гэты час усе рагулі (47 гуртоў) выпасаюцца, з іх 16 гуртоў — круглыя суткі.  З мэтай павелічэння надояў да канца тыдня на кругласутачны выпас будзе пераведзена пераважная колькасць  гуртоў кароў, а таксама быкі. 14 гуртоў цялушак выпасаюцца. Нядрэнныя паказчыкі дасягнуты па якасці малака: 50 працэнтаў прададзена дзяржаве гатункам экстра і 50 — вышэйшым.  Абмяркоўваючы справы сельскагаспадарчыя, Міхаіл Шалкоўскі, разам з іншым, указаў на неабходнасць паскорыць здачу лому чорных металаў.

Зарплату — да 25 мая

Да падвядзення вынікаў першага паўгоддзя засталося менш за паўтара месяца. Гэты тэрмін, як адзначыла намеснік старшыні райвыканкама Тамара Рудая, прадпрыемствы і арганізацыі павінны папрацаваць з поўнай выкладкай, каб выканаць даведзеныя раёну прагнозныя паказчыкі сацыяльна-эканамічнага развіцця. Асаблівую занепакоенасць, па словах намесніка старшыні, выклікае выкананне такіх з іх, як валавая вытворчасць сельскагаспадарчай прадукцыі і прыцягненне інвестыцый у асноўны капітал. З мэтай вырашыць узнікшыя па інвестыцыях пытанні на гэтым тыдні, па словах Тамары Рудой, пройдзе рабочая нарада з удзелам усіх зацікаўленых службаў. На кантролі — правядзенне аўкцыёнаў, бліжэйшы з якіх запланаваны на 26 мая. Што датычыцца заработнай платы за красавік, то яна на прадпрыемствах і ў арганізацыях павінна быць выплачана не пазней 25 дня месяца. 

Аб вакцынацыі — загадзя

Намеснік старшыні райвыканкама Святлана Носава завастрыла ўвагу прысутных на планёрцы кіраўнікоў прадпрыемстваў і арганізацый на неабходнасці ўжо цяпер пачынаць работу па заключэнні дагавораў на вакцынацыю работнікаў супраць грыпу. Намеснік старшыні паведаміла аб праведзенай на мінулым тыдні справаздачна-выбарчай канферэнцыі ГА “БРСМ”, падчас якой першым сакратаром раённага камітэта арганізацыі абрана Вольга Худакова, і аб пасяджэнні рабочай групы па аграэкатурызму, на якім абмяркоўвалася пытанне рэгістрацыі на тэрыторыі Гарохаўскага сельсавета аб’екта дадзенага прызначэння. Даводзячы інфармацыю аб правядзенні ў Магілёве нарады па арганізацыі летніх будатрадаў, Святлана Носава адзначыла, што ў нашым раёне на іх дзейнасць заключана 5 дагавораў.

Лета — час рыхтавацца да зімы

Ход падрыхтоўкі народнай гаспадаркі да ацяпляльнага сезону 2011-2012 г.г., па словах намесніка старшыні райвыканкама Ігара Кісяля, абмяркоўваўся на мінулым тыдні на абласной нарадзе. На бягучым тыдні нарада па гэтых пытаннях пройдзе ў раёне з удзелам кіраўнікоў прадпрыемстваў і арганізацый.

Завастраючы ўвагу на пытаннях будаўніцтва жылля, Ігар Кісель адзначыў, што план уводу апошняга ў эксплуатацыю за 1-е паўгоддзе будзе выкананы.

Алена КАРПЕНКА. 

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.