Нараджэнняў зарэгістравана меней
За першы квартал сёлетняга года ў раёне зарэгістравана 40 нараджэнняў, што на 7 меней, чым за гэты ж перыяд мінулага года. Менш, у параўнанні да мінулага года, зарэгістравана і смярцей: 145 супраць 150. На 2 меней за тры месяцы адзначана таксама і шлюбаў: 22 — у мінулым годзе, 20 — сёлета.
Цікавы і той факт, што з 40 нованароджаных у першым квартале года роўна палова хлопчыкаў і палова дзяўчынак, у мінулым годзе дзяцей мужчынскага полу было значна болей — 29, жаночага — 18.
Калі аналізаваць узроставы паказчык мам і тат, то наймалодшай мамай і сёлета, і ў мінулым годзе стала 17-гадовая жанчына, найстарэйшай — сёлета 37 год, летась было 39. Самы малады бацька ў гэтым годзе — 20-гадовы, найстарэйшаму як сёлета, так і ў мінулым годзе — 42 гады.
Увогуле, як адзначае начальнік аддзела ЗАГС Бабруйскага райвыканкама Т.Л. Лісоўская, сітуацыя з нараджаемасцю і смяротнасцю па выніках апошніх пяці год прыкладна аднолькавая, колькасныя паказчыкі вагаюцца ў межах адзінак. Між тым, адзначана і не надта добрая, па словах Таццяны Леанідаўны, тэндэнцыя, якая выклікае трывогу: павялічваецца колькасць маладых мам, якія нараджаюць дзіця, не знаходзячыся пры гэтым у зарэгістраваным шлюбе. У мінулым годзе з 47 дзяцей 22 з’явіліся на свет у маці-адзіночак . Сёлета сітуацыя не палепшылася.
Алена КАРПЕНКА.