Заканчваецца першы квартал года. У сувязі з гэтым намеснік старшыні райвыканкама Тамара Рудая нагадала звярнуць увагу на выкананне даведзеных прагнозных паказчыкаў і заданняў, у асаблівасці па валавой сельскагаспадарчай прадукцыі, аказанні бытавых паслуг насельніцтву, тавараабароце, прыцягненні інвестыцый у асноўны капітал, уводзе жылля ў эксплуатацыю. Аб’ёмы вытворчасці і рэалізацыі прадукцыі, па словах Тамары Рудой,  неабходна нарошчваць месяц ад месяца, таму што ад гэтага напрамую залежыць павелічэнне заработнай платы, якая ўжо на канец года павінна скласці ў сярэднім 600 долараў ЗША. Што тычыцца інвестыцый, то ўпраўленню капітальнага будаўніцтва райвыканкама быў дадзены жорсткі ўказ — адкрыць фінансаванне па ўсіх інвестыцыйных праектах, з тым, каб даведзены на квартал паказчык па прыцягненні інвестыцый быў забяспечаны. Было нагадана таксама звярнуць увагу на выкананне задання па здачы металалому. 

Намеснік старшыні адзначыла і тое, што на кантролі знаходзіцца даручэнне губернатара вобласці Пятра Рудніка адносна правядзення аўкцыёнаў па продажу аб’ектаў, якія не выкарыстоўваюцца. Было нагадана, што ўсе яны павінны падтрымлівацца ў здавальняючым стане. На тэрыторыях аб’ектаў не павінна быць маёмасці, якая не выстаўляецца на продаж, а таксама смецця. Камісійнае абследаванне дадзеных аб’ектаў адбудзецца на гэтым тыдні. Акрамя таго, было нагадана аб неабходнасці да 1 красавіка ўсім суб’ектам гаспадарання разлічыцца за спажытыя энерганосьбіты.

Алена КАРПЕНКА.