Глушанскі пасялковы Савет дэпутатаў — лепшы ў вобласці
У пятніцу на мінулым тыдні ў Магілёве адбылося пасяджэнне Прэзідыума абласнога Савета дэпутатаў, на якім былі падведзены вынікі спаборніцтваў сярод органаў мясцовага самакіравання вобласці за мінулы год.
Прыемна адзначыць, што пераможцам спаборніцтваў сярод сельскіх і пасялковых Саветаў дэпутатаў з прысуджэннем 1-га месца прызнаны Глушанскі пасялковы Савет дэпутатаў, які ўзначальвае М.Л. Сушчанка. Пасялковаму савету ўручаны пераходны Чырвоны сцяг, Дылом 1-й ступені і грашовая прэмія ў суме 500 базавых велічынь, што на сёння складае 16,5 млн. рублёў.
На пасяджэнні Прэзідыума абласнога Саветаў дэпутатаў былі таксама названы сельскія саветы — пераможцы абласных спаборніцтваў па закупу лішкаў малака ў насельніцтва. У іх спісе і сельсаветы нашага раёна.
Так, Гарбацэвіцкі сельскі Савет заняў 2-е месца сярод сельскіх і пасялковых саветаў за дасягненні найвышэйшых паказчыкаў закупу малака на адну карову (2867 кг) і ўзнагароджаны грашовай прэміяй у памеры 150 базавых велічынь.
3-е месца ў абласных спаборніцтвах па гэтым жа паказчыку з уручэннем грашовай прэміі ў памеры 100 базавых велічынь прысуджана Бортнікаўскаму сельскаму Савету дэпутатаў (2628 кг на адну карову).
Сярод малаказдатчыкаў вобласці, якія забяспечылі здачу найбольшай колькасці малака з гаспадаркі, 2-е месца заняў жыхар аграгарадка Міхалёва Бортнікаўскага сельсавета А.А. Хурсанаў, які прадаў дзяржаве 89,6 т малака.
Алена КАРПЕНКА.