Спартыўныя дасягненні школьнікаў
У выхадныя дні прайшлі раённыя спаборніцтвы па лыжных гонках і мнагабор’і “Абаронца Айчыны” сярод моладзі дапрызыўнога і прызыўнога ўзросту, удзел у якіх прынялі ўсе агульнаадукацыйныя школы раёна.
Як у спаборніцтвах па лыжных гонках, так і ў мнагабор’і перавага была на баку навучэнцаў Цялушскай школы (настаўнік фізкультуры А.І. Гацко). Яны занялі першыя агульнакамандныя месцы, значна пераўзыйшоўшы сваіх сапернікаў. За каманды-пераможцы выступалі Сяргей Крычко, Сяргей і Віталь Сікорскія, Таццяна Шынкаронак, Таццяна Лаўрэнцьева, Юлія Фархутдзінава, Марына Цялюк, Дзмітрый Нікалаенкаў і Станіслаў Гажак. З іх пераможцамі ў асабістым першынстве сталі Сяргей Крычко, Юлія Фархутдзінава, Сяргей Сікорскі і Таццяна Шынкаронак.
Другія агульнакамандныя месцы занялі навучэнцы Брожскай школы. Пераможцам у асабістым першынстве па лыжных гонках прызнаны Максім Арэх, прызёрамі — Сяргей Нікітка і Дзмітрый Макарчанка.
Трэцімі прызёрамі агульнакаманднага першынства ў лыжных гонках сталі вучні Варатынскай школы, у мнагабор’і “Абаронца Айчыны” — Гарохаўскай.
Вячаслаў Давідовіч,
дырэктар ДЮСШ.