Адпачынак у асалоду
Што можа быць прыемней адпачынку ў школьным аздараўленчым лагеры, калі і сядзець за партай не трэба, і побач сябры з цікавымі гульнямі, і такі насычаны захапляльнымі мерапрыемствамі і запамінальнымі падзеямі графік.
Упэўнена, з гэтым пагодзяцца ўсе, хто адпачываў і набіраўся моцы на дзіцячай пляцоўцы Хімоўскага ВПК “Дзіцячы сад-школа” для дзяцей пачатковага звяна і дашкольнай групы — усяго тут пабывала 45 дзяцей, а таксама створанага на базе школы лагера працы і адпачынку. Апошні дзейнічае з 15 чэрвеня, яго выхаванцы — 20 вучняў ва ўзросце ад чатырнаццаці год.
Дзецям прапануецца не толькі выдатнае харчаванне, багатае на садавіну, гародніну, вітамінныя сокі, але і паездкі па розных цікавых мясцінах. Як паведаміла намеснік дырэктара школы па вучэбнай рабоце В.М. Пішчык, малодшыя дзеці пабывалі на экскурсіі ў Магілёўскім заасадзе і на дзіцячай пастаноўцы ў Бабруйскім тэатры імя Дуніна-Марцінкевіча. Выхаванцы лагера працы, па словах начальнік лагера Н.І. Стралковай, наведалі Жлобінскі аквапарк і плануюць зрабіць экскурс па месцах баявой славы Клічаўшчыны. Адзначым і тое, што выхаванцы лагера працы і адпачынку ў першай палове дня заняты карыснай справай: шчыруюць на кветніках, глядзяць за садовымі дрэвамі, збіраюць новую школьную мэблю. Словам, бавяць час цікава і з карысцю.
Алена КАРПЕНКА.