Прафесію выбрала правільна

У СВК “Калгас імя Дзяржынскага” Лілія Гарабец працуе з часу далучэння да гэтай гаспадаркі Бабруйскага СВК “Перамога”, куды прыйшла маладым спецыялістам пасля заканчэння Бабруйскага аграрна-эканамічнага каледжа. Яе абавязкі — налічваць заработную плату механізатарам і паляводам.

Бухгалтарскі стаж спецыяліста толькі пачаў свой адлік, шмат з чым даводзіцца сутыкацца ўпершыню, многаму даводзіцца вучыцца, але ўжо і гэтага часу, па словах дзяўчыны, хапіла, каб зразумець, што прафесію выбрала правільна. Цяпер галоўнае — зведаць усе яе таямніцы і набрацца вопыту.

— У гэтым мне дапамагае калектыў, — дзеліцца Лілія, — які ў нас дружны, прыветлівы, кожны гатовы прыйсці на дапамогу.

Да таго ж, каб папоўніць скарбонку ведаў, і сама Ліля не сядзіць склаўшы рукі: завочна працягвае вучобу па спецыяльнасці ў Горацкай сельскагаспадарчай акадэміі.

На гэты час, па словах дзяўчыны, маюцца складанасці толькі транспартнага характару: сама яна бабруйчанка, і штодня даводзіцца ездзіць на працу. Аднак, з уводам у эксплуатацыю новага жылля і гэтае пытанне ў гаспадарцы абяцаюць вырашыць.

На маё запытанне, ці звязвае малады спецыяліст сваё далейшае жыццё з сельскай мясцовасцю (сваю палавінку яна яшчэ не сустрэла), ці ёй, гарадской жыхарцы, гэта тым болей не трэба, калі і мясцовыя дзяўчаты імкнуцца ў горад, Лілія, жартуючы, адказвае:

— Давялося б.

І ўжо сур’ёзна дадае:

— Жыла б, канешне, бо, па праўдзе сказаць, мне тут вельмі падабаецца. 

Алена КАРПЕНКА.

Фота Дзмітрыя БЕГУНОВІЧА.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.