На планёрцы ў райвыканкаме

Пытанні, звязаныя з вытворчасцю малака, не губляюць сваёй вастрыні і надзённасці. Менавіта ім, як адзначыў на планёрцы ў панядзелак першы намеснік начальніка райсельгасхарчу Аляксандр Осіпаў, прысвячалася нарада на мінулым тыдні ў аблвыканкаме. Што тычыцца нашага раёна, то тут маюць месца мерапрыемствы, накіраваныя на павелічэнне росту малака: завозяцца бялковая сыравіна і неабходныя камбікармы. Працягваецца работа па павышэнні яго якасці.

Значная ўвага надаецца таксама рамонту сельскагаспадарчай тэхнікі, падрыхтоўцы яе да веснавых палявых работ. Гатоўнасць апошняй, па словах Аляксандра Осіпава, у межах 70 працэнтаў.

Намеснік старшыні райвыканкама Тамара Рудая заклікала кіраўнікоў прадпрыемстваў і арганізацый строга трымаць на кантролі выкананне прагнозных паказчыкаў за студзень. Усе аддзелы, па словах Тамары Мікалаеўны, гэтым часам працуюць над праграмай мерапрыемстваў у межах Года якасці.   

Аб тым, што ў раёне працягваецца абследаванне ільготных катэгорый грамадзян на прадмет пажарнай бяспекі, паведаміла на планёрцы намеснік старшыні райвыканкама Святлана Носава. Агучыўшы вынікі раённай “Лыжні-2010”, Святлана Сяргееўна адзначыла, што ў раёне ўжо вядуцца падрыхтоўчыя работы да яшчэ аднаго значнага мерапрыемства — народнага гуляння “Масленіца”.

На планёрцы было агучана імя старшыні камісіі па падрыхтоўцы і правядзенню выбараў у мясцовыя саветы дэпутатаў. Ім абраны дырэктар Гарохаўскага ВПК “Дзіцячы сад-школа” Святаслаў Дашкоўскі. Старшыням сельсаветаў было рэкамендавана ўжо цяпер пачынаць падрыхтоўку памяшканняў да выбараў. 

На планёрцы абмяркоўваліся таксама пытанні газіфікацыі населеных пунктаў раёна (дакладчык: намеснік старшыні райвыканкама Ігар Кісель), работы па ачыстцы ад снегу дарог (начальнік ДЭУ-72 Сяргей Казлоў), крымінагеннай сітуацыі на тэрыторыі раёна (начальнік Бабруйскага РАУС Сяргей Ільін), работы санітарнай і экалагічнай службаў (галоўны санітарны ўрач Валянціна Парахневіч, намеснік начальніка інспекцыі прыродных рэсурсаў і аховы акаляючага асяроддзя Мікалай Грашчанкоў) і некаторыя іншыя.

 Алена КАРПЕНКА.

 

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.