У мінулыя выхадныя на базе Глушанскага ВПК “Дзіцячы сад-школа” прайшлі раённыя спаборніцтвы па лыжных гонках у двух узроставых групах сярод агульнаадукацыйных школ і па зімнім мнагабор’і “Абаронца Айчыны” — сярод моладзі дапрызыўнога і прызыўнога ўзросту.

У лыжных гонках сярод школьнікаў па-за канкурэнцыі як у камандным, так і ў асабістым першынствах, былі лыжнікі Цялушскага ВПК (настаўнік фізкультуры А.І. Гацко). Абсалютнымі пераможцамі ў асабістым першынстве прызнаны Марына Цялюк, Зарына Лаўрыновіч, Андрэй Крывіцкі і Арцём Дудаль. 2-е месца занялі Юлія Фархутдзінава, Іван Вавула, Сяргей Крычко з Цялушскай школы і Вераніка Васільева — з Брожскай. На трэцім месцы — Ірына Заікіна і Аляксандр Дудаль з Цялушскага ВПК, Анастасія Парахневіч з Варатынскай школы і Антон Роскач — з Гарохаўскага ВПК.

У камандным першынстве на 2-м месцы лыжнікі Брожскай, на трэцім — Хімоўскай школы.

У зімнім мнагабор’і сярод моладзі дапрызыўнога і прызыўнога ўзросту ў пераможцы выйшлі зноў жа юнакі з Цялушы. Другое месца ў юнакоў Гарохаўскай, трэцяе — Хімоўскай школ.

У асабістым першынстве, ва ўзроставай катэгорыі 15-16 год, перамог Сяргей Крычко з Цялушскай школы. На другім месцы Руслан Шпакоўскі з Хімоўскай, на трэцім — Аляксандр Шкуратаў з Гарохаўскай школы.

Ва ўзроставай катэгорыі 17-18 год пераможцай у мнагабор’і (лыжныя гонкі, стральба з пнеўматычнай вінтоўкі, падцягванне на перакладзіне) стаў Арцём Дудаль, другое месца заняў Вадзім Барадзін з Брожскай школы, трэцяе — Фёдар Кантаеў — з Ленінскай.

Вячаслаў ДАВІДОВІЧ,

дырэктар ДЮСШ.