Як паведаміў на планёрцы ў панядзелак першы намеснік начальніка райсельгасхарчу Аляксандр Осіпаў, у раёне праводзяцца мерапрыемствы, накіраваныя на павелічэнне малочнай вытворчасці. Сярод іншых — набыццё камбікорму, якога толькі за апошні месяц адыйшоўшага года ў гаспадаркі было завезена болей за 600 тон. У параўнанні да мінулага года валавая вытворчасць малака ў раёне павялічылася і склала на раніцу панядзелка 105 працэнтаў.

Значная ўвага гэтым часам, па словах Аляксандра Васільевіча, надаецца і рамонту тэхнікі, падрыхтоўкі яе да веснавых палявых работ. Складзены дэтальны графік па кожнай гаспадарцы адносна таго, якія дэталі патрабуюцца, у якой колькасці і г.д.

Пачатак кожнага новага года — гэта падвядзенне вынікаў мінулага. У гэтай сувязі намеснік старшыні райвыканкама Тамара Рудая заклікала ўсіх, і ў першую чаргу начальнікаў аддзелаў райвыканкама, з усёй адказнасцю аднесціся да справаздач, своечасова накіраваць апошнія ў статыстыку.

Завяршыліся навагоднія святы. Па словах намесніка старшыні райвыканкама Святланы Носавай, яны прайшлі ва ўсіх клубных установах раёна без непажаданых здарэнняў. Святлана Сяргееўна нагадала і тое, што на гэтым тыдні адбудзецца пасяджэнне каардынацыйнага савету па здароваму ладу жыцця.

На планёрцы абмяркоўваліся таксама пытанні, звязаныя з будаўніцтвам жылля, уводам у строй жывёлаводчага камплексу “Акцябр”, пытанні ацяплення, ачысткі ад снегу дарог. Дарэчы, што тычыцца апошняга, то старшыня райвыканкама Міхаіл Шалкоўскі адзначыў станоўчую работу дарожных службаў і выказаў спадзяванне, што такім чынам, без прамаруджванняў, дарожнікі будуць несці сваю варту і надалей.        

Калі большасць людзей звязваюць навагоднія святы з магчымасцю адпачыць, то супрацоўнікам міліцыі ў гэтыя дні звычайна не да адпачынку. Як паведаміў начальнік Бабруйскага РАУС Сяргей Ільін, за мінулы тыдзень на тэрыторыі раёна было ўчынена 16 злачынстваў, з іх 2 — цяжкія. Правілы дарожнага руху парушылі 122 вадзіцелі, прычым, двое кіравалі транспартным сродкам у нецвярозым стане, за што панясуць пакаранне.  

Алена КАРПЕНКА.