Галоўныя пытанні тыдня

На планёрцы ў панядзелак, якую правёў старшыня раённага выканаўчага камітэта М.У. Шалкоўскі, былі заслуханы даклады  намеснікаў старшыні райвыканкама па сацыяльна-эканамічным развіцці раёна, вырашэнні найбольш значных пытанняў часу і вызначаны задачы на бліжэйшыя дні.

У сельскай гаспадарцы ўвага працягвае канцэнтравацца вакол палявых работ. Зерневыя культуры, па словах першага намесніка старшыні райвыканкама В.У. Сямёнава, убраны на 97 працэнтах плошчаў. Заканчваецца сяўба азімага рапсу, пасля чаго гаспадаркі пачнуць сяўбу азімых зерневых. У хуткім часе прыступяць  і да ўборкі кукурузы. 

Што да жывёлагадоўлі, то тут працягвае весціся работа, накіраваная на павелічэнне вытворчасці малака і мяса. Вялікая ўвага пры гэтым  надаецца распрацоўцы збалансаваных рацыёнаў кармлення жывёлы.

Жнівень скончыўся. Справаздачы аб выкананні прагнозных паказчыкаў па яго выніках, а таксама па выніках сямі месяцаў года павінны быць своечасова прадстаўлены ў аддзел эканомікі, — заўважыла, звяртаючыся да кіраўнікоў арганізацый, намеснік старшыні райвыканкама Т.М. Рудая. Закрануўшы пытанне закупу ў насельніцтва яблык, Міхаіл Уладзіміравіч пацікавіўся, наколькі поўна інфармацыя аб гэтым  даведзена да жыхароў раёна, і парэкамендаваў трымаць дадзенае пытанне на асаблівым кантролі.

Адзначыўшы, што на Бабруйшчыне з 4 па 6 верасня, у раёне вёсак Панюшкавічы і Шчаткава, будзе праходзіць музычны фестываль “Культурная эвалюцыя”, С.С. Носава, намеснік старшыні райвыканкама, завастрыла ўвагу работнікаў РАУС на неабходнасці забеспячэння там грамадскага парадку. У аўторак ва ўсіх навучальных установах раёна празвіняць школьныя званкі, запрашаючы вучняў на першы ўрок новага навучальнага года. Сёлета ён пройдзе пад назвай “Зямля бацькоў — мая зямля”. Па добрай традыцыі павіншаваць вучняў і педагогаў з пачаткам навучальнага года прыйдуць і кіраўнікі прадпрыемстваў і арганізацый раёна.

Абмяркоўвалі на планёрцы і падрыхтаванасць суб’ектаў гаспадарання  да зімы. Як адзначыў в.а. намесніка старшыні райвыканкама І.М. Кісель, па стане на 26 жніўня з 18 карыстальнікаў цеплавой энергіі пашпарты гатоўнасці атрымалі 2 (Каменская дапаможная школа-інтэрнат і Каменскі псіханеўралагічны дом-інтэрнат), з 40 цеплакрыніц — 16. На гэтым тыдні работа па атрыманні пашпартоў будзе актывізавана. 

Не засталося без увагі і пытанне ўборкі зерневых культур на ўласных  надзелах вяскоўцаў. На гэтыя мэты практычна ўсе сельгасарганізацыі выдзелілі тэхніку. На раніцу 31 жніўня, па словах старшыні раённага Савета дэпутатаў Л.А. Баркоўскага, было ўбрана 76,7 працэнта плошчаў. Цалкам завяршылі ўборку пакуль толькі ў Сычкаўскім сельсавеце. Калі надвор’е будзе спрыяльным, то за 5-6 дзён уборка прысядзібных надзелаў будзе завершана.   

Абмяркоўваючы пытанні, звязаныя з навядзеннем чысціні на зямлі і добраўпарадкаваннем населеных пунктаў, старшыня райвыканкама заўважыў, што якасць устаноўкі агароджы ў аграгарадках не ўсюды здавальняючая, а гэта недапушчальна. Таксама Міхаіл Уладзіміравіч парэкамендаваў санітарным службам больш актыўна прыцягваць да адміністрацыйнай адказнасці недобрасумленную частку насельніцтва, тых, хто не хоча разумець, што навядзенне чысціні на зямлі — абавязак кожнага грамадзяніна.

Аб крымінагеннай сітуацыі на тэрыторыі раёна і мерах, накіраваных на папярэджанне злачынстваў, далажыў першы намеснік начальніка РАУС А.В. Шункевіч. 

Алена КАРПЕНКА.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.