Жыццё без галаўнога болю

Мала хто з нас у той ці іншай сітуацыі не скардзіўся на галаўны боль. Але мала хто ведае, што прычыны болю бываюць рознымі, а значыць, і лячыць яго трэба па-рознаму: у адных выпадках дастаткова пераключыцца на здаровы лад жыцця, у другіх — не абыйсціся без дапамогі спецыяліста.

З мэтай прафілактыкі захворванняў, звязаных з парушэннем мазгавога кровазвароту, і прапаганды здаровага ладу жыцця спецыялістамі Бабруйскага занальнага цэнтра гігіены і эпідэміялогіі сумесна са спецыялістамі іншых устаноў аховы здароўя Бабруйшчыны праводзіцца акцыя “Жыццё без галаўнога болю”. 

У панядзелак на гэтым тыдні інфармацыйна-прапагандысцкае мерапрыемства, у межах дадзенай акцыі, наладжанае спецыялістамі Цэнтра гігіены пры падтрымцы аддзела ідэялагічнай работы прайшло і ў раённым выканаўчым камітэце. Урач-валеолаг БЗЦГіЭ Л.І. Патапенка распавяла прысутным аб сімптомах і метадах прафілактыкі “сіндрому эмацыянальнага выгарання” (СЭВ). Аказваецца, да апошняга здольны прывесці нават аформлены не па густу работніка кабінет, не кажучы ўжо пра вымушанае штодзённае знаходжанне побач з чалавекам, якому ты не сімпатызуеш, і г.д. Між тым “сіндром эмацыянальнага выгарання”, на думку спецыялістаў,  здольны цалкам разрушыць арганізм чалавека і прывесці да шэрагу самых сур’ёзных хвароб. Урач-неўролаг, прадстаўнік фармацэўтычнай кампаніі “Гедэон Рыхтар” Г.В. Васьковіч пазнаёміла ўдзельнікаў акцыі з паняццем “галаўны боль напружання”, з тым, як папярэдзіць такі боль і якое лячэнне — медыкаментознае і немедыкаментознае — дапаможа ў барацьбе з нядугам.

Тут жа ў фае будовы райвыканкама медыкі прапаноўвалі прысутным вызначыць іх артэрыяльны ціск, дапамагалі падлічыць індэкс вагі цела, давалі парады звярнуцца да спецыялістаў, калі на тое была патрэба. Таксама былі арганізаваны кансультацыі ўрача-неўролага і псіхолага. 

Алена Карпенка.

Фота Дзмітрыя БЕГУНОВІЧА.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.