«Вучань года-2009»

У апошні дзень сакавіка ў актавай зале Цэнтра культуры і вольнага часу раёна прайшоў заключны этап раённага конкурсу «Вучань года-2009». Нягледзячы на традыцыйнасць, конкурс не губляе папулярнасці і з кожным годам збірае ўсё большую аўдыторыю. Пабалець за фіналістаў — а іх сёлета было 6 — прыехалі не толькі сябры, але і настаўнікі, і бацькі.

Каб выйсці ў фінал, вучням, якія прынялі ўдзел у конкурсе,  неабходна было зарэкамендаваць сябе з добрага боку ў двух папярэдніх турах: паказаць добрыя вынікі ў раённых, абласных, рэспубліканскіх алімпіядах, навукова-даследчых працах (1 тур) і праявіць свае здольнасці ў конкурсе даследчых работ, прысвечаных 65-годдзю вызвалення Беларусі ад нямецка-фашысцкіх захопнікаў (2 тур). Калі ў 2-м туры прынялі ўдзел 13 школьнікаў, то да заключнага — трэцяга, паспяхова вытрымаўшы папярэднія выпрабаванні, дайшлі 6 вучняў:  Шульжык Марына з Туголіцкай школы, Дайнэка Юля — з Бортнікаўскай, Счасновіч Жэня — з Варатынскай, Аляскерава Ірына — з Гарбацэвіцкай,  а таксама Шалаеў Андрэй — з Туркоўскага ВПК «Дзіцячы сад-школа» і Барадзін Марыя — з Осаўскага.    

На суд гледачоў і журы, у склад якога ўвайшлі начальнік аддзела адукацыі райвыканкама Ф.М. Багдановіч, начальнік аддзела па справах моладзі Н.У. Смірнова, дырэктар Цэнтра пазашкольнай выхаваўчай работы з навучэнцамі раёна Н.А. Барысава, загадчык раённым вучэбна-метадычным кабінетам Н.У. Бакач і метадыст  Т.У. Бокач,  фіналісты прадставілі свае візітныя карткі, прынялі ўдзел у інтэлектуальным заданні і прадэманстравалі дамашняе: творчы конкурс, прысвечаны Году роднай зямлі. З замілаваннем і любоўю пра малую радзіму і сваю сям’ю  распавяла Марына Шульжык. Ірына Аляскерава і Марыя Барадзін пазнаёмілі прысутных з паходжаннем назваў населеных пунктаў, дзе нарадзіліся, прадэманстравалі слайды з непаўторнымі краявідамі сваёй мясцовасці. Юля Дайнэка па матывах легенды пра паходжанне назвы вёскі Бортнікі стварыла мультыплікацыйны фільм. Цікавыя інсцэніроўкі прапанавалі гледачам Жэня Счасновіч і Андрэй Шалаеў.   

Конкурс, як гэта звычайна бывае,  праходзіў у напружанай і адначасова вясёлай атмасферы. Апошнюю задавалі жарты, якія гучалі са сцэны, і выступленні юных артыстаў, выхаванцаў Цэнтра пазашкольнай выхаваўчай работы.

Трэба сказаць, што барацьба за перамогу была ўпартай: усе без выключэння канкурсанты дэманстравалі шырокія веды і майстэрства трымацца на сцэне. Таму журы прыйшлося нялёгка.  Між тым усе прыйшлі да згоды: прысудзіць пачэснае званне «Вучань года-2009» вучаніцы Туголіцкай СШ Марыне Шульжык. Прыз сімпатый гледачоў дастаўся Яўгеніі Счасновіч, а пераможцам дня прызнаны Андрэй Шалаеў.

Вяртаючыся да Марыны, адзначым, што яна вучыцца ў 11 штрых-класе, марыць атрымаць вышэйшую адукацыю і стаць банкірам, а сваёй перамогай, лічыць, абавязана ўсім, хто побач: бацькам, сябрам і, вядома ж, настаўнікам.

Алена КАРПЕНКА.

Фота Дмітрыя БЕГУНОВІЧА.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.