У першым квартале бягучага года ў райвыканкам ад грамадзян і юрыдычных асоб паступіла 53 звароты, што на 16 (23%) меней, чым за аналагічны перыяд папярэдняга года. Знізілася (з 8 да 6) колькасць зваротаў, якія паступілі ў выканаўчы камітэт праз дзяржаўныя органы вышэйшых структур і болей чым удвая (з 7 да 3) — у адміністрацыю Прэзідэнта Рэспублікі Беларусь.

Са студзеня па сакавік зарэгістраваны 2 паўторныя звароты — адносна выплаты кампенсацыі за знос жылога дома (пытанне на кантролі) і вылучэння зямельнага ўчастка (зварот прызнаны неабаснаваным), а таксама 3 калектыўныя звароты (у мінулым годзе такіх не было). Апошнія тычацца будаўніцтва музея Алеся Адамовіча ў пас. Глуша Бабруйскага раёна, дзейнасці садовага таварыства, адмены рашэння сельскага выканаўчага камітэта.

Сярод зваротаў у райвыканкам традыцыйна пераважалі тыя, што датычацца пытанняў жыллёвага фонда і жыллёва-камунальнай гаспадаркі (28% ад агульнай колькасці). Некалькі меней, але дастаткова частыя (17%) — па пытаннях землекарыстання, 13% — працы, занятасці, аховы працы. Звярталіся грамадзяне таксама па пытаннях архітэктуры і будаўніцт­ва (6%), культуры, фізічнай культуры і спорту, турызму (4%), грамадзянска-прававых спрэчак (4%). Па адным звароце — па пытаннях аграпрамысловага комп­лексу, транспарту, гандлю, фінансаў, адукацыі.

З пытанняў жыллёвага фонду і жыллёва-камунальнай гаспадаркі найбольш частымі былі аб аплаце за вываз камунальных адходаў, аднаўленні пашкоджанай ліўневай каналізацыі, падтапленні ўчастка, водазабеспячэнні, закрыцці ў населеным пункце лазні, набыцці жылых памяшканняў, у тым ліку за сродкі сямейнага капіталу, навядзенні парадку на землях агульнага карыстання. Прычым агульная колькасць такіх зваротаў, у параўнанні з аналагічным перыядам мінулага года, таксама знізілася.

Звароты па пытаннях землеўпарадкавання датычыліся тлумачэння заканадаўства, вызначэння межаў зямельных участкаў, аказання дапамогі ў высвятленні канфліктных сітуацый. Найбольш значная іх група — устанаўленне межаў зямельных участкаў, выкліканае спрэчкамі паміж суседзямі. Зрэшты, апошняе — і ў аснове зваротаў грамадзян па пытаннях архітэктуры і будаўніцтва.

Адказваючы на пытанне, чым, па меркаваннях спецыяліста, выклікана прыкметнае зніжэнне колькасці зваротаў у выканкам — адсутнасцю праблем у вяскоўцаў ці даверу да раённай улады, начальнік аддзела па рабоце са зваротамі грамадзян і юрыдычных асоб райвыканкама Наталля Тропіна матывуе гэта шырокай тлумачальнай работай, якая вядзецца ў раёне. У прыватнасці, правядзеннем дзён інфармавання насельніцтва, пашыраных сходаў з удзелам грамадскасці, прамых “тэлефонных” ліній, прыёмаў грамадзян, у тым ліку выязных, адказнымі асобамі выканкама і непасрэдна кіраўніком раёна, падчас якіх і здымаюцца праблемныя пытанні.

Алена КАРПЕНКА.