Прававыя юрысты — у дапамогу працаўнікам
Болей за 100 прававых інспектараў Федэрацыі прафсаюзаў Беларусі (далей — ФПБ) у чацвер на гэтым тыдні правялі па ўсёй краіне прававыя прыёмы грамадзян — аказвалі людзям бясплатную юрыдычную дапамогу па пытаннях, звязаных з абаронай іх працоўных правоў і сацыяльна-эканамічных інтарэсаў.
Дадзеная форма работы мае свае перавагі ў параўнанні з юрыдычнай кансультацыяй традыцыйнага фармату. Па-першае, за яе не трэба плаціць грошы. А па-другое — не трэба далёка ехаць. Усё, што патрабуецца зрабіць для атрымання прафесійнай юрыдычнай дапамогі — прыйсці ў вызначаны час прыёму ў аб’яднанне прафсаюзаў ці ў адну з арганізацый раённага цэнтра.
Сёлета ў Беларусі ўжо праведзена 9 прафсаюзных прыёмаў, падчас якіх прававымі інспектарамі працы было прынята каля 4 000 чалавек. Аналіз зваротаў выявіў, што пераважная іх частка датычылася пытанняў, якія закраналі працоўную дзейнасць грамадзян — 64%. Другімі па актуальнасці сталі пытанні прымянення жыллёвага заканадаўства — 13%. На трэцім месцы — пенсійнага заканадаўства (10%).
Непасрэдна ў нашым раёне, па словах старшыні Бабруйскага раённага аб’яднання прафсаюзаў, якое ўваходзіць у Федэрацыю прафсаюзаў Беларусі, Людмілы Крычко, з пачатку года праведзена 8 прафсаюзных прыёмаў, з іх 6 — у раённых арганізацыях і ўстановах. На прыёмы звярнулася болей 20 чалавек, кожны з іх тут жа на месцы атрымаў вычарпальны адказ. У асноўным, як было адзначана, пытанні тычыліся працоўнага заканадаўства. У прыватнасці, працягу працоўных адносін з работнікам, які знаходзіцца ў адпачынку па доглядзе дзіцяці падчас рэарганізацыі прадпрыемства; пераводу работніка на другую пасаду; дыскрымінацыі па ўзросце падчас прыняцця на работу; фарміравання заробнай платы з улікам стымулюючых выплат за працяглы працоўны стаж; атэстацыі працоўных месцаў, парадку прадастаўлення кампенсацый па ўмовах працы; скарачэння ў сувязі з рэарганізацыяй установы; парадку падзелу адпачынку на часткі, замены часткі адпачынку грашовай кампенсацыяй і інш.
Варта адзначыць і тое, што ў шэрагу рэгіёнаў да прафсаюзных юрыстаў падчас прававых прыёмаў далучыліся супрацоўнікі пракуратуры (22 верасня Генеральная пракуратура Рэспублікі Беларусь і ФПБ падпісалі пагадненне аб узаемадзеянні). У лістападзе сумесныя прыёмы прайшлі ў 66 раёнах краіны, на іх было прынята болей за 500 грамадзян. Дадзеная форма работы дазваляе аператыўна рэагаваць на праблемы і вырашаць іх, бо прадстаўнікі ФПБ і пракуратуры непасрэдна на месцы могуць абмеркаваць усе нюансы і выпрацаваць план далейшых дзеянняў па абароне правоў працаўнікоў. У межах супрацоўніцтва ўжо праходзяць сумесныя мерапрыемствы па наглядзе і грамадскім кантролі за выкананнем заканадаўства аб працы, ахове працы і прафсаюзах, сумесныя прыёмы грамадзян, а таксама абмен інфармацыяй і прапановамі па ўдасканаленні заканадаўства і правапрымяняльнай практыкі. Плануецца, што такая форма работы будзе працягнута і пашырана.
Толькі сёлета прафсаюзнымі юрыстамі па ўсёй краіне выяўлена больш за 30 000 парушэнняў заканадаўства аб працы. Падчас непасрэднага іх удзелу адноўлена на рабоце каля 100 чалавек, працаўнікам вернута каля 2 млн. рублёў незаконна ўтрыманых альбо нявыплачаных грашовых сум.
Алена КАРПЕНКА.