Стаўку робяць на эфектыўнасць вытворчасці

У філіяле “Харчавік-агра” ААТ “Чырвоны харчавік” (дырэктар М.М. Стры­­жэўскі) стаўку, у першую чаргу, робяць на эфектыўнасць вытворчасці. І ўпэўнены — дасягнуць найбольшага эфекту пры найменшых затратах ад дзейнасці сельгаспрадпрыемства можна, памяняўшы карэнным чынам падыход да гаспадарання.

Ніякай самадзейнасці, а толькі тэхналогіі — упэўнены кіраўнік філіяла. І небезпадстаўна. У сельгаспрадпрыемстве ўкаранілі сучасную тэхналогію па аднаўленні статку — вырошчванні маладняку. У выніку за год на адным цяляці зэканомілі 50 рублёў. А з улікам таго, што маладняку ў гаспадарцы 600 галоў, эканамічны эфект склаў 30 000. Яшчэ адзін прыклад — набыццё сучаснага кормазмешвальніка-раздатчыка, дзякуючы якому з’явілася магчымасць рыхтаваць для жывёлы збалансаваную кормасумясь. Зрэшты, да корму ў гаспадарцы патрабаванні надзвычай сур’ёзныя: імкнуцца своечасова скошваць сенажаці, пры закладцы сенажу і сіласу на зіму выкарыстоўваць толькі тэхналагічна-рэкамендаваныя, у правільнай прапорцыі, кансерванты.

І, вядома ж — не стамляюцца вучыцца: спазнаваць новае, перай­маць станоўчы вопыт. Работнікі філіяла — пастаянныя ўдзельнікі семінараў-вучоб, якія праводзяцца не толькі ў раёне, але і за яго межамі. Калі ж пазнаваўчыя мерапрыемствы ладзяцца на тэрыторыі гаспадаркі, то ўдзел у іх прымаюць не толькі спецыялісты, але і механізатары, жывёлаводы — час патрабуе, каб тэхналагічна падкаванымі былі ўсе. “Трэба разумець, што на сучасным этапе развіцця сельгасвытворчасці, — заўважае дырэктар, — высокіх поспехаў будуць дасягаць толькі высокапрафесіяналы”.

Такія, як аператар машыннага даення філіяла Вольга Шкрадзюк (на фота), чыя плённая праца адзначана ў пачатку лістапада ў Мінску Беларускім прафсаюзам работнікаў аграпрамысловага комплексу.

Алена КАРПЕНКА. Фота Юрыя ЮРКЕВІЧА.

Добавить комментарий

Ваш e-mail не будет опубликован.