…Рэспубліканская акцыя пад такой назвай праходзіць у краіне на працягу кастрычніка. Прыняць у ёй удзел запрашаюцца жанчыны без узроставых абмежаванняў. Агляд праводзяць тэрапеўты, гінеколагі, хірургі.

З якой актыўнасцю праходзіць акцыя ў нашым раёне, чым яна выклікана і якія ставіць мэты — аб гэтым мы пацікавіліся ў загадчыка тэрапеўтычнага аддзялення Баб­руйскай гарадской паліклінікі №2
А.Г. Сярогіна:

— Падчас акцыі ўрачы нашай установы і анкалагічнага дыспансера шчыльна ўзаема­дзейнічаюць. Жанчыны, у якіх пасля агляду ў паліклініцы выяўлены тыя ці іншыя праблемы, тут жа накіроўваюцца на паглыбленае абследаванне спецыялістамі анкадыспансера і пры неабходнасці — на лячэнне. На дзень размовы абследавана каля 60 сельскіх жанчын, і акцыя працягваецца. Між тым хочацца завастрыць увагу насельніцтва на тым, што праблема рака малочнай залозы сапраўды існуе, і на тым, што жанчыны павінны рабіць, як сябе паводзіць, каб на працягу доўгага часу заста­вацца здаровымі.

Рак малочнай залозы — паталогія дастаткова пашыраная, уваходзіць у тройку найбольш распаўсюджаных відаў ракаў у беларускіх жанчын. І, нягледзячы на тое, што захворванне гэта надзвычай сур’ёзнае, пры своечасовым выяўленні і лячэнні дасягаюцца станоўчыя вынікі. Але толькі пры своечасовым.

На жаль, далёка не ўсе жыхаркі нашага раёна да гэтага прыслухоўваюцца і тым болей адразу ж ідуць з праблемай да доктара. Гэтым змяншаюць шанцы на выздараўленне.

Каб небяспечная хвароба не застала знянацку, жанчыны павінны быць насцярожанымі ў адносінах яе. Не меней аднаго разу на месяц рабіць агляд і самастойна право­дзіць пальпацыю малочнай залозы. Пры выяў­ленні змен формы ці зацвярдзення ў ёй неабходна неадкладна наведаць ўрача-гінеколага, участковага тэрапеўта альбо акушэрку — не даць захворванню (пры яго пацвярджэнні) развіцца да той ступені, калі лячэнне не дае станоўчых вынікаў. У мэтах прафілактыкі жанчынам, чый узрост болей за 45 год, адзін раз у год неабходна рабіць мамаграфію — эфектыўны спосаб ранняй дыягностыкі раку, да 45 год — УЗІ-абследаванне малочных залоз. Таксама адзін раз у два гады добра б было абследавацца на анка-маркер.

Акцыя нездарма завецца “Супраць раку — разам”. На прафілактыку і ранняе выяўленне хваробы павінны працаваць і ўрачы, і самі пацыенткі. Таму мэта мерапрыемства, паўтаруся, не толькі абследаваць як мага болей жанчын, а звярнуць іх увагу на праблему, на важкасць свайго здароўя.

Размову вяла Алена КАРПЕНКА.