На працягу двух дзён у Мінску будзе праца­ваць пяты Усебеларускі народны сход, на які збяруцца дэлегаты са ўсіх абласцей Беларусі і сталіцы. Ад нашага раёна на высокі форум дэлегіравана 6 чалавек. Іх кандыдатуры прапанаваны і зацверджаны дэлегатамі раённага сходу, які адбыўся ў аўторак на гэтым тыдні. Да таго як апошнія прыступілі да работы, мы пацікавіліся, чаго чакаюць яны ад народнага веча.

Анатоль Шэлег, старшыня Слабадкоўскага сельскага Савета дэпутатаў:

— Вядома ж, вырашэння праб­лемных пытанняў, звязаных з развіццём эканомікі краіны. Будзе стабільна працаваць эканоміка — будзе развівацца сацыяльная сфера і як вынік — паляпшацца дабрабыт людзей, у тым ліку вяскоўцаў.

Міхаіл Стрыжэўскі, дырэктар філіялу “Харчавік-Агра” ААТ “Чырвоны харчавік”:

— Чакаем такіх рашэнняў, якія б садзейнічалі павышэнню ўзроўню жыцця лю­дзей. Асабліва чакаем рашэння на самым высокім узроўні праблемных пытанняў у сельскай гаспадарцы, бо ад гэтага залежыць дабрабыт земляробаў, нашых сялян — усіх тых, хто сваёй працай забяспечвае харчовую бяспеку краіны.

Вераніка Падаляк, 1-шы сакратар РК ГА “БРСМ”:

— Чакаю ад 5-га Усебеларускага народнага сходу толькі станоўчых эмоцый. У краіне немалая падтрымка аказваецца маладым сем’ям, шматдзетным, хочацца, каб так было і надалей. Таксама хацелася б, каб высокі форум даў пасыл укараненню ў жыццё шматлікіх цікавых праектаў, якія сёння прапаноўвае моладзь. Ну і, вядома ж, каб было дастаткова ўвагі ўдзелена пытанням занятасці маладых людзей, стварэння для іх новых працоўных месцаў.

Валерый Казлоў, адказны сакратар раённай ветэранскай арганізацыі:

— Упэўнены, усіх беларусаў гэтым часам цікавіць пытанне эканамічнага развіцця нашай дзяржавы. Спадзяюся, што на народным сходзе будуць намечаны планы па стабілізацыі эканомікі, акрэс­лены шляхі пераадолення тых недахопаў, якія не даюць ёй упэў­нена развівацца. Як чалавека пенсійнага ўзросту, мяне хвалюе памер пенсіі. І тут зноў усё ўзаемазвязана: будзе развівацца эканоміка — будзе магчымасць павялічыць пенсіі.

Ларыса Праскурня, загадчыца дзіцячага садка в. Вішнёўка:

— Улічваючы тое, што працую ў адукацыі, спадзяюся, што будуць закрануты і пытанні гэтай галіны, у тым ліку надзвычай неабходнае на сёння — падняцце прэстыжу настаўніка. А ўвогуле, упэўнена, высокі форум будзе садзейнічаць захаванню міру на нашай зямлі. Бо вельмі важна, каб і надалей заставалася жыццё спакойным, каб людзі клаліся спаць і прачыналіся пад мірным небам, каб дзеці і ўнукі раслі шчаслівымі.

Аляксандр Волікаў, дырэктар цэнт­ралізаванай клубнай сістэмы раёна:

— Як напэўна і усім грамадзянам краіны, мне хочацца, каб наша Беларусь развівалася і прыгажэла, каб у краіне была стабільнасць, людзі былі сацыяльна абароненымі. І пяты Усебеларускі народны сход — гэта якраз той форум, на якім дадзеныя пытанні, на мой погляд, павінны знайсці водгук. Улічваючы тое, што развіццё культуры наўпрост залежыць ад стабільнага функцыянавання рэальнага сектару эканомікі, спадзяюся, што пытанням апошняга на сходзе будзе ўдзелена дастаткова ўвагі.

Людміла Крычко, старшыня раённага аб’яднання прафсаюзаў:

— Чакаю, што бу­дуць абмеркаваны глабальныя пытанні, у першую чаргу — сацыяльна-эканамічнага развіцця краіны, павышэння ўзроўню жыцця людзей. Вядома ж, хвалююць пытанні занятасці членаў прафсаюза, захавання працоўных месцаў, недапушчэння іх масавых скарачэнняў, адтоку з краіны высокакваліфікаваных маладых кадраў. Зразумела, цяпер у дзяржаве эканамічная сітуацыя няпрос­тая, але, упэўнена, гэтая з’ява часовая, і рашэнні праблемных пытанняў абавязкова будуць знойдзены, у тым ліку і падчас Усебеларускага народнага сходу.

Размову вяла Алена КАРПЕНКА.