Прафсаюз — на абароне інтарэсаў работнікаў
У аўторак на гэтым тыдні ў райвыканкаме працавала справаздачна-выбарчая канферэнцыя Бабруйскай раённай арганізацыі Беларускага прафсаюза работнікаў адукацыі і навукі, удзел у якой прыняў загадчык арганізацыйнага аддзела Магілёўскага абкама галіновага прафсаюза В.Я. Сапоткін. Асноўныя пытанні канферэнцыі: справаздача старшыні райкама прафсаюза аб рабоце раённага камітэта за апошнія пяць год, справаздача рэвізійнай камісіі за гэты перыяд і выбары складу райкама на новы тэрмін паўнамоцтваў.
Трымаючы слова перад удзельнікамі канферэнцыі, лідэр раённай прафсаюзнай арганізацыі Т.У. Бокач адзначыла, што на гэты час арганізацыя налічвае 25 “пярвічак” з колькасцю членаў — больш за 900. На працягу справаздачнага перыяду, з лістапада 2009 года па кастрычнік 2014-га, работа райкама была накіравана на абарону правоў і законных інтарэсаў членаў арганізацыі ў розных праявах, на развіццё сацыяльнага партнёрства — узаемадзеянне наймальніка і работніка, на ўдасканаленне і пошук новых форм і метадаў работы ў арганізацыі. На гэтым накірунку шмат што дасягнута, удалося вырашыць нямала праблемных пытанняў. Значная ўвага, акрамя іншага, надавалася грамадскаму кантролю: вывучаліся пытанні заключэння, змен, скасавання працоўных дагавораў, выканання норм калектыўнага дагавору і г.д. На пастаянным кантролі райкама знаходзілася выкананне патрабаванняў аховы працы ва ўстановах адукацыі, праведзена немалая работа па арганізацыі вольнага часу работнікаў. Між тым многія пытанні, якія хвалююць членаў арганізацыі і райкам прафсаюза ў тым ліку застаюцца, як адзначыла Т.У. Бокач, не вырашанымі альбо вырашанымі часткова. У прыватнасці, не адбылося істотнага росту заработнай платы педработнікаў, маецца праблема з замацаваннем маладых спецыялістаў у галіне, для педагогаў дадатковай адукацыі не адноўлены “сельскія” выплаты, працягласць летняга адпачынку, педагогам не своечасова прадастаўляліся камандзіровачныя выплаты. Над вырашэннем гэтых і іншых праблемных пытанняў прыйдзецца працаваць ужо новаму складу раённага камітэту.
Даючы ацэнку рабоце райкама прафсаюза, кіраўнікі і лідэры прафсаюзных “пярвічак” устаноў адукацыі ў сваю чаргу дзяліліся ўласнымі станоўчымі напрацоўкамі, накіраванымі на развіццё сацыяльнага партнёрства, абарону правоў і інтарэсаў членаў арганізацый, а таксама праблемамі, якія маюцца. Да прыкладу, намеснік дырэктара Цэнтра творчасці раёна А.С. Стэльмак завастрыла ўвагу прысутных на кадравай праблеме ва ўстанове — палова педагогаў цэнтра працуюць па сумяшчэнні, у асноўным складзе пераважаюць маладыя спёцыялісты і педагогі пенсійнага ўзросту.
Выбіраючы новы склад раённага камітэту прафсаюза работнікаў адукацыі і навукі, члены арганізацыі аддалі свае галасы ў падтрымку тых, каму давяраюць, хто інтарэсы калектыву і кожнага работніка ў асобку ставіць гэтак жа высока, як і ўласныя. Узначаліць райкам прафсаюза на новы тэрмін паўнамоцтваў ізноў даверылі — прычым, адзінагалосна — Т.У Бокач.
Віншуючы актыў раённай прафсаюзнай арганізацыі з абраннем, начальнік аддзела адукацыі, спорту і турызму райвыканкама А.У. Баркоўская пажадала новаму складу райкама прафсаюза плённай працы на карысць людзей, якія даверылі ім абарону сваіх правоў.
Алена КАРПЕНКА.
Фота Сяргея ПАДАЛЯКА.